Türkiye saqchiliri xitaygha jasusluq qilghanliqi ilgiri sürülgen alte neper gumandarni tutqun qilghan
2024.02.20
Istanbulni merkez qilghan Uyghur teshkilatlirigha da'ir uchurlarni toplighanliqi we uni xitay istixbarat organlirigha yetküzgenliki ilgiri sürülgen alte neper gumandar, türkiye dölet xewpsizliki da'iriliri teripidin tutqun qilin'ghan.
In'gliz tilida chiqidighan “Nazaretchi” (Al-Monitor) gézitining xewer qilishiche, türkiye dölet xewpsizliki da'irilirining 20-féwral küni birla waqitta élip barghan tutqun opératsiyeside türkiyediki gholluq Uyghur pa'aliyetchiliri we teshkilatlirigha da'ir “Uchurlarni toplighan” alte neper gumandarning tutqun qilin'ghanliqi bildürülgen. Közetküchiler, türkiye dölet xewpsizlik da'irilirining xitay istixbarat organlirigha ishleydighan jasusluq gumandarlirini ashkara tutqun qilishi az körülidighan ehwal, dep qarimaqta. Türkiye “Anatoliye agéntliqi” ning xewer qilishiche, nöwette türkiye xewpsizlik da'iriliri yene bir jasusluq gumandarining iz-dérikinimu jiddiy qilmaqta iken.
Türkiye-xitay munasiwetliri ötken yili 5-ayda erdoghanning qayta pirézidéntliqqa saylinishidin kéyin, ijabiy burulush hasil qilghan bolsimu, lékin xitayning Uyghurlargha tutqan mu'amilisi ikki dölet arisida izchil ixtilaptiki mesile bolup kelmekte. Türkiye dölet xewpsizlik da'irilirining bu herikiti, xitayning türkiyediki Uyghur muhajirlirigha qarita chégra halqighan basturushni kücheytip, Uyghurlar üchün jiddiy bixeterlik tehditi peyda qiliwatqan bir waqitta élip bérilghanliqi qeyt qilinmaqta. Türkiyediki “24 Téléwiziye qanili” ning xewiride bildürüshiche, bu qétimqi xitay jasusluq gumandarlirini tutqun qilish herikiti istanbul jumhuriyet bash teptishining térrorluq we teshkillik jinayetlerni sürüshtürüsh bashqarmisi teripidin élip bérilghan.
Xewerde, tutqunning türkiye milliy istixbarat teshkilati (MIT) teminligen uchurlargha asasen élip bérilghanliqi, bu uchurlarda xitay xelq jumhuriyiti istixbarat da'iriliri bilen körüshüp, türkiyediki sherqiy türkistan jama'et erbabliri, jem'iyetler we qurulushlar heqqide uchur toplighan yette gumandarning bayqalghanliqi we bu kishilerni tutqun qilish buyruqi bérilgenliki bildürülgen. Halbuki, bu heqtiki xewerlerde tutqun qilin'ghan 6 gumandar we iz-dériki qiliniwatqan yene bir gumandarning ismi we kimliki heqqide héchqandaq uchur bérilmigen.