Türkiyediki 3 neper Uyghur xitayning mejburiy bala chüshürüsh we qiyin-qistiqigha uchrighanliqini ashkarlighan

Muxbirimiz erkin
2021-06-04
Share

Xitaydin qéchip chiqip türkiyede panahliniwatqan 3 neper Uyghur 3-‍iyun küni chet el taratqulirigha guwahliq bérip, ‍özlirining xitay da'iriliri teripidin qandaq mejburiy bala chüshürgenliki we kéche-kündüz qiyin-qistaqqa uchrighanliqlirini ashkarlighan. Ular londondiki "Uyghur sot kollégiyesi" 4-‍iyun bashlinish harpisida chet el taratqulirigha guwahliq bergen.

Birleshme agéntliqining xewer qilishiche, bümeryem rozi isimlik bir shahit ‍özining 2007-yili 4-balisigha hamildar bolghanliqi, biraq xitay da'irilirining qorsaqtiki 6 yérim ayliq balisini mejburiy chüshürüwetkenlikini bildürgen.

Uning éytishiche, eyni waqitta xitay da'iriliri uni bashqa 8 ayal bilen birge mashinida doxturxanigha élip barghan iken. Xewerde éytilishiche, mehmut tewekkül isimlik yene bir shahit özining 2010-yili türmige tashlan'ghanliqi we qiyin-qistaqqa uchrighanliqini bildürüp, xitay da'irilirining ‍özini uning bir qérindishi tüpeyli tutqun qilghanliqi, bu qérindishigha diniy kitap neshr qildurghanliqi üchün tutush buyruqi chiqirilghanliqini éytqan.

Uning éytishiche, da'iriler u we uning bilen tutulghanlarni kahishliq yerge yatquzup, qol-putlirini kishenligen, gaz turubisidek turubigha baghlap, kéchiche soraq qilghan ‍iken.

Xewerde éytilishiche, bu kishiler widéyo arqiliq londondiki "Uyghur sot kollégiyesi" dimu guwahliq béridiken. Xewerde en'giliyediki mezkur musteqil sot kollégiyesi 4 künlük guwahliq yighinida nechche onlighan shahitlarning guwahliqliqini anglaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet