Turpan yalquntaghning témpératurisi 80 sélsiye giradusqa chiqip, tarixiy rékort yaratqan

 Uyghur élining turpan shehiri bu hepte tarixtiki eng qattiq issiq hawa éqimining hujumigha uchrap, bu sheherge qarashliq bir qisim jaylarning hawa témpératurisi tarixiy rékort yaratqan. Xitay taratqulirining xewer qilishiche,  16-iyul küni turpandiki yalquntaghning yer üsti issiq hawa témpératurisi 80 sélsiye giradusqa yétip barghan. Xitay taratquliri, yalquntaghdiki bu qattiq issiqning xitay sayahetchilirini jelp qiliwatqanliqini ilgiri sürüwatqan bolsimu, lékin bu kishilik hoquq teshkilatlirining lagér we ishlepchiqirish karxaniliridiki Uyghur tutqunliri hemde mejburiy emgek ishlemchilirining ehwaligha bolghan endishisini kücheytken.

Chet el mété'orologiye organliri 17-iyul turpan astana bazirining 16-iyul yekshenbe künidiki témpératurisining 52.2 Sélsiye giradusqa yétip, bu jayning shu küni kaliforniye shtatidiki “Halaket jilghisi” din qalsila dunyaning eng issiq jayi bolghanliqini élan qilghan idi. Lékin “Jenubiy xitay etigenlik pochtisi”gézitining 18-iyul bergen xewiride, yalquntaghning shu künki yer üsti témpératurisining astana baziridin köp derijide éship ketkenliki, yalquntaghning yer üsti témpératurisining 80 sélsiye giradusqa yétip barghanliqi, xitay mété'orologiye tarmaqlirining “Qattiq issiq kelgüsi besh künde dawamliq körülidu” dep agahlandurghanliqini éytqan.

Uyghur rayonda körülgen qattiq issiq, xitayning “Gherbning tokini sherqqe yötkesh” pilani boyiche rayonida qurup chiqqan nurghunlighan kömür éléktir istansisilirining hawagha köplep zeherlik karbon gazi qoyup bérip, rayonning hawa kilimati we ékologiyelik muhitini dawamliq bulghawatqanliqigha bolghan endishilerni téximu kücheytmekte.

Melum bolushiche, xitay hökümiti 2017-yili özining “Yéngi dewrdiki shinjangni bashqurush istratégiyesi” ni ijra qilishqa bashlighandin buyan, turpan yalquntagh rayoni uning “Shinjangni medeniyet arqiliq ozuqlandurush” namidiki assimilyatsiye we “Jungxu'a milliti ortaq gewdisi éngi” ni berpa qilish herikitide xitay sayahetchilirini jelp qilidighan muhim sayahet nuqtilirining biri bolup kelgen idi.