Уйғур дияридики “үч әл” хизмитиниң техиму чоңқурлишидиғанлиқи мәлум болди

Мухбиримиз әзиз
2022.06.28
Share on WhatsApp
Share on WhatsApp

Хитай һөкүмити башқурушидики шинхуа агентлиқиниң 28-июндики хәвиридә ейтилишиичә, хитай һөкүмити 28-июн күни уйғур диярида 2014-йилидин буян изчил давамлишип кәлгән “әлрайини билиш, әлгә нәп йәткүзүш, әлни майил қилиш” сияситини буниңдин кейинму изчил иҗра қилиш керәкликини җакарлиған.

Хәвәрдә ейтилишичә, учтурпан наһийәси имамлирим йезиси төвәнки мәкит кәнтидики деһқанлар төвәнгә чүшкән “үч әл” кадирлириниң “йетәкчилики” дә парникта қеринқулақ (мур), могу қатарлиқларни териш арқилиқ “бай” болған. Болупму бу җәһәттә ичкиридин кәлгән “техник” хитайларниң “ярдими” бәкму чоң болған. Әмма шу җайдики уйғур деһқанлар териватқан терилғу йәрләрниң кейинки тәқдири қандақ болғанлиқи, бу йәрләрниң һазир кимләрниң игидарчилиқида икәнлики тоғрисида бир еғизму сөз қилинмиған.

Мәлум болушичә, хитай һөкүмитиниң уйғур дияридики “муқимлиқ бәрпа қилиш” нишанини орунлаштики бир муһим васитиси хитай һөкүмитиниң кадирлирини һәрқайси йеза-қишлақларға “үч әл” хизмитигә әвәтиш болуп кәлгәнлики мәлум. Йеқинда ашкара болған “шинҗаң сақчи һөҗҗәтлири” намидики архиплардин мәлум болушичә, бу хилдики кадирларни әвәтиш һәққидә уйғур дияридики сабиқ партийә секретари чен чуәнго 2018-йилила мәхсус йолйоруқ берип “он миңлиған санда кадирлар қошунини төвәнгә чүшүрүш арқилиқ уларниң муқимлиқни сақлаштики ачқучлуқ ролини толуқ җари қилдуруш керәк” дегәникән. Хитайниң сабиқ җамаәт хәвпсизлик министири җав кеҗи болса шу вақиттила “шинҗаңдики муқимлиқни сақлаш тәдбирлирини қилчиликму бошитишқа болмайду” дегәникән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.