Uyghur diyaridiki “Üch el” xizmitining téximu chongqurlishidighanliqi melum boldi

Xitay hökümiti bashqurushidiki shinxu'a agéntliqining 28-iyundiki xewiride éytilishi'iche, xitay hökümiti 28-iyun küni Uyghur diyarida 2014-yilidin buyan izchil dawamliship kelgen “Elrayini bilish, elge nep yetküzüsh, elni mayil qilish” siyasitini buningdin kéyinmu izchil ijra qilish kéreklikini jakarlighan.

Xewerde éytilishiche, uchturpan nahiyesi imamlirim yézisi töwenki mekit kentidiki déhqanlar töwen'ge chüshken “Üch el” kadirlirining “Yétekchiliki” de parnikta qérinqulaq (mur), mogu qatarliqlarni térish arqiliq “Bay” bolghan. Bolupmu bu jehette ichkiridin kelgen “Téxnik” xitaylarning “Yardimi” bekmu chong bolghan. Emma shu jaydiki Uyghur déhqanlar tériwatqan térilghu yerlerning kéyinki teqdiri qandaq bolghanliqi, bu yerlerning hazir kimlerning igidarchiliqida ikenliki toghrisida bir éghizmu söz qilinmighan.

Melum bolushiche, xitay hökümitining Uyghur diyaridiki “Muqimliq berpa qilish” nishanini orunlashtiki bir muhim wasitisi xitay hökümitining kadirlirini herqaysi yéza-qishlaqlargha “Üch el” xizmitige ewetish bolup kelgenliki melum. Yéqinda ashkara bolghan “Shinjang saqchi höjjetliri” namidiki arxiplardin melum bolushiche, bu xildiki kadirlarni ewetish heqqide Uyghur diyaridiki sabiq partiye sékrétari chén chu'en'go 2018-yilila mexsus yolyoruq bérip “On minglighan sanda kadirlar qoshunini töwen'ge chüshürüsh arqiliq ularning muqimliqni saqlashtiki achquchluq rolini toluq jari qildurush kérek” dégeniken. Xitayning sabiq jama'et xewpsizlik ministiri jaw kéji bolsa shu waqittila “Shinjangdiki muqimliqni saqlash tedbirlirini qilchilikmu boshitishqa bolmaydu” dégeniken.