Хитай компартийиси орган журнили муһәрририниң есилип өлүвелишиниң тәпсилати хитайда чәкләнди

Мухбиримиз меһрибан
2016-06-28
Share

Хәвәрләрдин мәлум болушичә, өткән йәкшәнбә күни хитай компартийисиниң орган журнили “һәқиқәтни әмәлийәттин издәш” журнилиниң муһәррири 56 яшлиқ җу теҗи 26-июн йәкшәнбә күни сәһәрдә өзи ишләватқан идариниң йәр асти аптомобил тохтитиш залида есилип өлүвалған.

“хәлқ тори” ниң 26-июн йәкшәнбә кәчтики санида, “бейҗиң шәһәрлик фелйәтон җәмийитиниң муавин башлиқи, ‛һәқиқәтни әмәлийәттин издәш‚ журнилиниң муавин баш муһәррири, җу теҗи йәкшәнбә күни сәһәрдә туюқсиз вапат болди” дегән қисқа хәвәр берилип, униң өлүминиң тәпсилати вә сәвәби һәққидә һечнемә дейилмиди. Әмма хитайдики малийә гезитиниң йәкшәнбә кәч охшаш вақитта берилгән хәвиридә, җу теҗиниң өзини өлтүрүвалғанлиқи тилға елинған, лекин мәзкур хәвәр бирнәччә саәт ичидила өчүрүветилгән. Хитайдин радийомиз зияритини қобул қилған бир нәпәр мухбирниң ашкарилишичә, хитай һөкүмәт даирилири 27-июн дүшәнбә күни уқтуруш чиқирип, мухбирларниң җу теҗиниң өлүми һәққидә тәпсилий хәвәр бәрмәсликини, бу һәқтики қисқа хәвәрләрдә һөкүмәтниң уқтурушидики учурларни асас қилишни тәләп қилған.

Җу теҗини йеқиндин билидиған хитай зиялийлириниң радийомизға билдүрүшичә, җу теҗи өзини өлтүрүвелиштин 10 күн илгири ечилған фелйәтон муһакимә йиғинида, фелйәтонниң партийивийлики вә хәлқчиллиқи һәққидә өз қаришини баян қилған. Хитай коммунист һөкүмитиниң орган журнилиниң муавин баш муһәррири болған җу теҗи компартийә һакимийитиниң һимайичилиридин болсиму, әмма у характер җәһәттин нисбәтән кәң сиясәтни тәшәббус қилип, мақалилиридә хәлқ райини асас қилишни оттуриға қойған. Әмма йеқинқи икки йилдин буян униң муһәррирликидики “һәқиқәтни әмәлийәттин издәш” журнилида солчил идийидики әсәрләр көпләп елан қилинишқа башлиған. Журналниң муавин муһәррири болған җу теҗиниңму хизмитидин чәтләштүрүлгәнлики вә барғанчә соғуқ муамилигә учриғанлиқи журналда ишлигүчи хизмәтчиләрниң һәммиси билидиған ашкара мәхпийәтликкә айланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт