Үрүмчидә тунҗи нөвәтлик “шинҗаңниң кишилик һоқуқ тәрәққияти мунбири” йиғини өткүзүлгән

Чәтәл тәтқиқат орунлири вә кишилик һоқуқ тәшкилатлири бу һәптә б д т ниң ню-йоркта өткүзүлгән йиллиқ омумий йиғини мәзгилидә һәр хил паалийәтләрни уюштуруп, уйғур ирқий қирғинчилиқини қандақ тохтитишни музакирә қилған бир вақитта, хитай даирилириму үрүмчидә йиғин чақирип, “шинҗаңниң кишилик һоқуқ тәрәққияти” ни музакирә қилған. Хитай таратқулириниң хәвәрлиридин мәлум болушичә, 27-сентәбир күни үрүмчидә өткүзүлгән тунҗи нөвәтлик “шинҗаң кишилик һоқуқ ишлириниң тәрәққият мунбири” йиғини “шинҗаңдики һәр қайси милләтләр әмгикиниң маһийәтлик алаһидилики” дегән темида музакирә елип барған.

 Б д т әмгәк тәшкилати, чәтәл тәтқиқат орунлири вә кишилик һоқуқ тәшкилатлири уйғур мәҗбурий әмгикигә хатимә беришни, кәмситиш характерлик ишқа орунлаштуруш тәдбирлирини бикар қилишни тәләп қиливатқан бир вақитта, уйғур райони вә хитай өлкилиридин аталмиш “шинҗаң тәтқиқати” ға мунасивәтлик 12 тәтқиқатчиниң үрүмчигә йиғилип, райондики “һәр қайси милләтләр әмгикиниң маһийәтлик алаһидилики” ни музакирә қилиши диққәт қозғимақта.

 Шинхуа агентлиқиниң хәвәр қилишичә, йиғин “шинҗаңдики һәр милләт кишилириниң җапалиқ әмгәк арқилиқ йеңи техникилиқ маһарәтләрни игиләп, қорсиқини тойдуруштин яхши йейишкә, учиға иссинғудәк кийим кийиштин яхши кийинишкә, ешәк һарвисида йүрүштин заманиви қатнаш қораллирида сәпәр қилишқа еришип, турмуш шараити үзлүксиз яхшиланғанлиқи” илгири сүргән.

  Шинхуа агентлиқиниң билдүрүшичә, йиғинда нәнкәй университети “кишилик һоқуқ тәтқиқат мәркизи” ниң мудири чаң җйән доклат берип: “хитайниң заманивилишиш мусаписидә, шинҗаң һөкүмитиниң инсанға лайиқ ишләш һоқуқини қоғдаш үчүн актип вә үнүмлүк тәдбирләрни қоллинип, мәзкур муһим вә түп кишилик һоқуқни техиму үнүмлүк қоғдиғанлиқи” ни билдүргән. Һалбуки, чәтәл тәтқиқатчилириниң доклатлирида ашкарилинишичә, нәнкәй университетиниң мәзкур тәтқиқат мәркизи 2019-йили тәйярлиған бир доклатида уйғурларни хитай өлкилиридә мәҗбурий әмгәккә селиш уларниң нопусини азайтишниң үнүмлүк чариси икәнликини оттуриға қойғаникән.