بۈگۈن ئۇيغۇر ئاپتونوم رايونىنىڭ شاۋكەت ئىمىن ۋە چېڭ جېڭشەن قاتارلىق بىر گۇرۇپپا ئەمەلدارلىرى ئۈرۈمچى شەھىرىنىڭ شامالباغ قاتارلىق جايلىرىدىكى مەسچىتلەرگە تەكشۈرۈشكە بېرىپ بۇ مەسچىتلەرنىڭ بىخەتەرلىك تەدبىرلىرىنى كۆزدىن كەچۈرگەن.
تەڭرىتاغ تورىنىڭ خەۋىرىدىن مەلۇم بولۇشىچە، ئۇلار مەسچىتلەردىكى ئاتالمىش ۋەتەنپەرۋەر دىنىي زاتلار بىلەن سۆھبەت ئۆتكۈزۈپ، رامزان مەزگىلىدىكى خۇتبىلىرىدا مىللەتلەر ئىتتىپاقلىقىنى تەشۋىق قىلىشىنى، كىشىلەرنى بۆلگۈنچىلىككە ۋە تېررورلۇققا قارشى تەربىيەلەشكە دەۋەت قىلغان.
مەسچىتلەردە كومپارتىيە تەشۋىقاتىنىڭ ئېلىپ بېرىلىشى، رايوندىكى ئۇيغۇر خەلقىنىڭ نارازىلىقىغا ۋە چەتئەلدىكى كىشىلىك ھوقۇق پائالىيەتچىلىرىنىڭ ئىزچىل تەنقىدىگە ئۇچراپ كەلگەن. ئاپتونوم رايون رەھبەرلىرىنىڭ مەسچىتلەرگە بىۋاسىتە تەكشۈرۈشكە بېرىشى ۋە دىنىي زاتلارنى سىياسەتنى تەشۋىق قىلىشقا قىستىشى، ئۇيغۇر كۆزەتكۈچىلەر تەرىپىدىن خىتاي دائىرىلىرىنىڭ يېقىنقى ۋەقەلەردىن توغرا دەرس ئالالمىغانلىقىنىڭ بېشارىتى دەپ قارالماقتا.