Déyk kang:“Köyüp ölgenler qachalmay qalghanlardur!”

Muxbirimiz eziz
2022.11.27
Share on WhatsApp
Share on WhatsApp

Ürümchidiki ot apiti dunyagha melum bolghandin kéyin otta köyüp ölgenlerning emeliyette xitay hökümiti élan qilghan sandin nechche hesse köp ikenliki heqqide türlük texminler otturigha chiqqanidi. Birleshme agéntliqning muxbiri déyk kang (Dake Kang) ot apitide köyüp ölgenlerning chet'ellerdiki bir qisim tughqanliri bilen söhbetleshkendin kéyin melum bolghan ehwallar ré'alliqning hemde uninggha seweb bolghan amillarning heqiqetenmu kishiler tesewwur qilghandin köp éghir bolghanliqini delilligen.

Déyk kang söhbetleshken kishilerning biri abdulhapiz muhemmed imin bolup uning éytip bérishiche, uning hammisi töt balisi bilen birlikte köyüp ölgen. Hammisining éri éli metniyaz bolup, köpke tonulghan karxanichilarning biri süpitide 2017-yili lagérgha élip kétilgen. Yoldishining lagérdin qaytip kélishini kütüwatqan bu ayal töt balisi bilen öz öyide “Wirusni nölge chüshürüsh” siyasiti boyiche qamilip olturghanda binagha ‍ot kétip a'ile boyiche köyüp ketken. Ürümchi sheherlik hökümetning bu heqtiki bayanatida “Bir qisim ahalining öz-özini mudapi'e qilish iqtidari ajiz bolghanliqtin ot apiti yüz bergende köyüp ketken” déyilgen. Emma ijtima'iy taratqularda derhal buninggha reddiye bérilip “Öyler sirttin zenjirliwétilgenliki üchün héchkimmu qéchip chiqishqa amal qilalmighan” dégen mezmunda inkaslar yézilghan. Déyk kang ziyaret qilghan ürümchi ahalisidin bireylenmu bu ehwalni delillep “Öylerni sirttin zenjirlep qoyghili bir heptidin ashqan idi” dégen.

Birleshme agéntliq bu bina öylerning zenjirlep qoyulush ehwalini öz aldigha delilleshke amal qilalmighan bolsimu ot öchürüsh mashinilirining otni öchürüshige üch sa'ettin artuq waqit ketkenlikini éniqlighan.   Birleshme agéntliq  yene bezilerning “Buningda nurghun sirliq hadisiler mewjut” dégendek inkaslirigha qarita yene bezilerning “Ot öchürüsh mashiniliri qorugha kirgendin kéyin méngishqa ilaj qilalmighan. Chünki qorudiki mashinilarning igiliri öyliride qamilip qalghan bolghachqa toxtitip qoyulghan mashinilarni yötkeshke mumkin bolmay qalghan؛ yene bezi mashinilar nechche aylap ishlitilmigenliktin bataréyesi ölgen” dégenlirini körsitip ,bu ehwallarningmu otta köyüp ölgenlerning öyliridin chiqalmay qalghanlar ikenlikini wasitilik halda delilligen.

Nöwette ot kétishning sewebi heqqide türlük uchurlar otturigha chiqiwatqan bolsimu, otta köyüp ölgenlerning öyliridin qéchip chiqishqa amal qilalmay qalghanlar ikenliki köprek tekitliniwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.