Үрүмчидин тайландқа биваситә һава йоли ечилған

Үрүмчи һава қатниши даирилири уйғур районидин шәрқий җәнубий асияға қатнайдиған линийә ечилғанлиқини билдүргән.

“шаңхәй күндилик гезити” ниң шинхуа агентлиқидин нәқил елип хәвәр қилишичә, бу иштин хәвәрдар хадимлар җәнубий һава йоллири ширкити башқурушидики мәзкур линийәниң үрүмчидин тайландниң баңкок шәһиригә қатнашни башлиғанлиқини билдүргән.

Хәвәргә қариғанда, нөвәтчи айропилан үрүмчидин сәйшәнбә, пәйшәнбә вә шәнбә күнлири учуп гәнсуниң ләнҗу шәһиридә тохтап өткәндин кейин, баңкокқа баридикән.

Мәлум болушичә, бу биваситә айропилан үрүмчидин баңкокқа бериш вақтини 10 саәт әтрапида қисқартидикән.

Баңкок хитай пуқралири әң көп баридиған саяһәт мәнзиллиридин бири. Өткән йили авғустта йүз бәргән баңкок ераван ибадәтханиси һуҗумида өлгән 20 адәмниң аз дегәндә 5 нәпириниң хитай пуқраси икәнлики хәвәр қилинған иди.

Даириләр мәзкур һуҗумда уйғурларниң қоли барлиқини илгири суруп, адам қарадағ, мирәли йүсүп исимлик икки гуманларни қолға алғанлиқини елан қилған.

Улар йәнә мирәли йүсүпниң қолида хитай паспорти бар “шинҗаңлиқ” икәнликини билдүргән иди.