Amérika kéngesh palatasi urush jinayetchilirini jazalash qanun layihesi muqullidi

Muxbirimiz erkin
2022.12.27

Amérika kéngesh palatasi ötken hepte qanun muqullap, urush jinayetchilirini amérikada jazalashning da'irisini kéngeytken. Melum bolushiche, qanun layiheside urush jinayetchiliri yaki ziyankeshlikke uchrighuchilarning dölet tewelikige qarimay, jawabkarlarni sotqa tartishning yoli échilghan. Kéngesh palatasi bu qanun layihesini ukra'ina prézidénti zéléniskiy ötken hepte amérikada ziyarette bolup, dölet mejliside nutuq sözligen küni maqullighan. Ukra'ina hökümiti we kishilik hoquq teshkilatlirining qeyt qilishiche, rusiye bu yil 2-ayda ukra'inagha qoralliq hujum qilghandin béri, ukra'ina puqralirigha qarita minglighan yoshurun urush jinayiti sadir qilghan.

“Urush jinayiti qurbanliri üchün adalet qanuni” namliq bu qanun layihesi démokratik kéngesh palata ezasi dik durbén bilen jumhuriyetchi kéngesh palata ezasi chak grasléy teripidin sunulghan bolup, mezkur qanun layihiside dölet mejlisining 1990-yili maqullighan mewjut qanunining da'irisi kéngeytilgen. Amérikaning 1990-yili maqullan'ghan qanunida urush jinayiti sadir qilghuchilar yaki ziyankeshlikke uchrighuchilar peqet amérika puqrasi bolsa, amérikada erz qilish yaki sotlinishi belgilen'gen idi.

Melum bolushiche, yéngi qanun layiheside urush jinayetchiliri yaki ziyankeshlikke uchrighuchilarning dölet tewelikige qarimay, amérikada sotlinishi we adalet telep qilishigha bolidiken.

Yéngi qanun layiheside yene urush jinayitining waqit cheklimisi bikar qilinish bilen bir waqitta, urush jinayiti sadir qilghan birsini sotlash üchün amérika edliye ministirining testiqini élish belgilisimu bikar qilin'ghan. Melum bolushiche, bu qanun layihesi ötken hepte kéngesh palatasida muqullinip bir kündin kéyin awam palatasiningmu maqullishidin ötken. Nöwette, ezkur qanun layihesi prézidént baydén imza qoyghandin kéyin resmiy qanun'gha aylinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.