Хәлқара кәчүрүм тәшкилати русийәниң сүрийәдики һава һуҗумлири "уруш җинайити һасил қилиши мумкин" деди

Мухбиримиз ирадә
2015-12-23
Share

Хәлқара кәчүрүм тәшкилати русийәниң сүрийәни бомбилаш һәрикити "уруш җинайити" һасил қилиши мумкин, деди. Мәзкур тәшкилат чаршәнбә күни елан қилған доклатида, русийәниң сүрийәдики һава һуҗумлири нәтиҗисидә йүзлигән авам пуқраниң өлгәнликини, олтурақ районлар, өйләр, мәсчитләр вә адәм көп базарлар вә һәтта дохтурханиларниң еғир дәриҗидә зәхимләнгәнликини билдүрүп "һуҗумлардики пакитлар русийәниң хәлқаралиқ инсанпәрвәрлик қанунлирини дәпсәндә қилғанлиқини көрситиду" дегән.

Бирақ, ройтерс агентлиқиниң хәвәр қилишичә, русийә мудапиә министирлиқи хәлқара кәчүрүм тәшкилатиниң юқиридики сөзлирини қәтий рәт қилип, тәшкилатниң доклатини "ялған билән толған" дәп әйиблигән.

Русийә армийәси бу йил 30-сентәбир күнидин етибарән сүрийәдики һава һуҗум һәрикитини башлиған иди. Русийә өзиниң бәшар әсәдкә ярдәм қилип, "даиш" террор тәшкилатиға һуҗум қиливатқанлиқини илгири сүрүп кәлгән.

Бирақ, хәлқара кәчүрүм тәшкилати "29‏-ноябирғичә болған арилиқта әң аз дегәндә 200 нәпәр авам пуқра русийәниң һава һуҗуми нәтиҗисидә өлди" деди.

Мәзкур тәшкилатниң оттура шәрқ вә шималий ағриқиға мәсул директори филип лутер "бундақ һуҗум уруш җинайити тәшкил қилиши мумкин" дәп әскәрткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт