Xitayda 2017-yili téléfon, intérnétlarni kimlik boyiche tizimlitish emeliylishidighanliqi élan qilindi

Xitay xelq torining 31-yanwardiki xewiride 1-féwraldin bashlap, pütkül xitay boyiche muqim téléfon we köchme téléfonlarni öz ichige alghan barliq téléfon abontlirining kimlik boyiche tizimlitish emeliylishidighanliqi, intérnét qollan'ghuchilirining kimlik boyiche tizimlitishi bu yil 6-ayning 1-künigiche pütkül xitay boyiche yolgha qoyulidighanliqi xewer qilindi.

Wikipidiyadiki uchur ambiridin melum bolushiche, xitayda téléfon abontlirining kimlik boyiche tizimlitishni telep qilinishi 2012-yildin bashlap xitaydiki bir qisim rayonlarda yolgha qoyulushqa bashlap, 2017-yili 1-ayning 31-künigiche pütün xitayda omumlashturup bolush uqturulghan. Intérnétni kimlik boyiche tizimlitish layihesi 2015-yili 6-ayda xitay memliketlik xelq qurultiyigha sunulghan, 2016-yili 11-ayning 7-küni échilghan 12-nöwetlik xelq qurultiyining 24-nöwetlik yighinida qarardin ötüp, 2017-yili 6-ayning 1-künidin bashlap ijra qilish élan qilin'ghan.

Xitay da'iriliri yillardin buyan téléfon alaqisi we intérnéttiki uchurlarni qamal qilishni kücheytip kéliwatqan bolup, xitay puqralirining uchur erkinliki mesilisi xelq'araning diqqitini qozghighan mesililerning biri. Kishilik hoquq teshkilatliri xitayni bu mesilide üzlüksiz tenqidlep kéliwatqan bolup, Uyghur diyarida 2009-yili yüz bergen 5-iyul ürümchi weqesidin kéyin, intérnét we téléfonda qanunsiz diniy uchurlarni yollighan, hökümet chekligen xewerlerni körgen we tarqatqan dégen bahanide tutqun qilinip, éghir jazagha uchrighan Uyghurlar mesilisi xelq'ara taratqulardiki qiziq nuqtilarning birige aylan'ghan idi.