Amérika Uyghur birleshmisi “Ighwa tarqatti” dep jazalan'ghan Uyghurlarning kimlikini ashkarilashni telep qildi

Amérika Uyghur birleshmisi bayanat élan qilip, xitay da'irilirini torda “Ighwa tarqatti” dep memuri tutup turush jazasigha buyrulghan kishilerning kimlikini ashkarilashqa chaqirdi.

Xitayning “Yer shari waqti géziti” yéqinda lükchün weqesidin kéyin 72 kishining “Torda ighwa tarqatti” dep tutqun qilinip, memuri tutup turush jazasi bérilgenlikini xewer qilghan. Mezkur gézitning xewiride, shixenzidin bir toluq ottura mektep oqughuchisi, qarimaydin 22 yashliq bir qiz we börchin nahiyisidin 29 yashliq bir köchmen ishchigha memuri chare körülgenlikini bildürgen bolsimu, lékin qalghan kishiler heqqide héchqandaq uchur bermigen.

Amérika Uyghur birleshmisining re'isi alim séytof “Xitayning lükchün weqesidin kéyin kishilerni torda térrorluqqa alaqidar uchurlarni tarqatti, dep keng kölemlik tutqun qilishi, uning uchurni qamal qilishni kücheytkenlikidin dérek béridu” dep körsetti.

U tutqunlarning kimlikini ashkarilashni telep qilip, “Dölet axbarat wasitiliri qamaqqa buyrulghan shexsler heqqide téximu köp uchur bilen teminlishi, ularning milliti, konkrét qamaq jazasi heqqide tepsiliy uchur bérishi kérek” dédi.