Даириләр чарвичиларни яйлақтин көчүрүш үчүн нурғун мәбләғ сәрп қилғанлиқини ашкарилиди

Йеқинда уйғур аптоном районлуқ тәрәққият вә ислаһат комитети баянат елан қилип, чарвичиларни яйлақтин көчүрүш вә муқим олтурақлаштуруш үчүн өткән 5 йилда җәмий 10 милярд сом мәбләғ сәрп қилғанлиқини билдүргән.

Баянатта өткән 5 йилда сәрп қилинған ғайәт зор соммилиқ мәбләғниң уйғур елидики яйлақларни қоғдаш, яйлақта мал-чарва беқишни чәкләш, чарвичиларни яйлақтин чекиндүрүп муқим ишләпчиқириш билән шуғуллинишқа риғбәтләндүрүш қатарлиқ түрләргә ишлитилгәнлики илгири сүрүлгән.

Хәвәрдә көрситилишичә, уйғур аптоном райониниң чарвичиларни олтурақлаштуруш мәблиғидин бәһримән болған аилиләр 270 миңдин ашқан болуп, уларниң көпинчиси әвлатму-әвлат давамлаштуруп кәлгән чарвичилиқ турмушидин қол үзүп, деһқанчилиқ яки саяһәтчилик игиликигә йүзләндүрүлгән икән.

Мәлум болушичә, уйғур аптоном районидики яйлақларниң омумий көлими 68 милйон мо болуп, хитайдики әң чоң чарвичилиқ районлириниң бири һесаблинидикән. Һалбуки, өткән бирқанчә он йил мабәйнидә уйғур елидики 80 % тин көпрәк яйлақлар бузғунчилиққа учрап, еғир екологийәлик чекиниш йүз бәргән.

Бир қисим көзәткүчиләр, даириләрниң чарвичиларни яйлақтин айрип муқим олтурақ һаятқа көчүрүши уйғур елида әзәлдин чарвичилиқ билән деһқанчилиқ гирәлишип кәлгән игилик системисини бузуп ташлапла қалмастин, көчмәнләр үчүн кәң земин һазирлайду дәп қаримақта.