Xitay da'iriliri Uyghur élida 5 milyon déqhan-charwichini öy-zéminliridin köchurüp bolghan

Muxbirimiz irade
2020.11.26

Xitay hökümitining Uyghur élida texminen 5 milyon yerlik déhqan-charwichini öy-zéminliridin ayrip köchürüwetkenliki melum boldi.

Xitayning “Xelq géziti” 26-noyabir küni “Shinjangda 5 milyon déhqan-charwichi yer tewreshke chidamliq öylerge köchüp kirdi” dep xewer tarqatqan. Halbuki, chet ellerdiki közetküchiler xitayning Uyghur élining jenubidiki Uyghur yéza ahalilirini asasliq nishan qilip, “Yer tewreshke chidamliq öy qurulushi”, “Emin öy qurulushi” dégen namlarda yürgüzgen köchürüsh heriketlirining emeliyette Uyghurlarni'öy-zéminliridin ayrish, tirikchilik menbesini késish we ularning tupraq bilen bolghan béghini üzüsh, shundaqla ularni yighip kontrol qilishni meqset qilghan bir keng kölemlik pilan ikenlikini ilgiri sürmekte.

Derweq, xitayning “Xelq géziti” xewerde yerken nahiyeside bir nechche ewladtin béri charwichiliq bilen shughullinip kelgen iminjan tash we uning a'ilisining nahiyening namratliqtin qutuldurush we köchürülgenlerni orunlashturush orni bolghan “Menggülük eminlik” menasini bildüridighan “Yong'en ahaliler bashqurush komitéti enkang 8-kenti 1-guruppisigha köchüp kelgenlikini, ötken üch yilda yerken nahiyesidiki 3 yéza-bazardiki 36 kenttin kelgen 1915 charwichi atalmish “Yer tewreshke chidamliq” öylerge köchürülgenlikini xewer qilghan.

Xewerde yene munular bayan qilin'ghan: “Shinjangning jenubidiki üch wilayet bir oblast shinjangdiki yéza ahalilirini yötkep olturaqlishish türining muhim nuqtisidur. 2016-Yildin bashlap, shinjangning jenubidiki üch wilayet bir oblast jem'iy 837 ming 800 yéza turalghu türini yolgha qoydi, 2020-yili shinjangning jenubidiki üch wilayet bir pblastta 29 ming 341 öy sélinidighan bolup, bular hemmisi tamamlinip boldi. Pütün rayon jem'iy 1 milyon 169 ming 800 yéza turalghu türini yolgha qoydi, 5 milyon'gha yéqin déhqan we charwichi yer tewreshke chidamliq öyge köchüp kirdi.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.