Uyghur diyaridiki wirus yuqumdarlirining tilgha élinmasliqi diqqet qozghimaqta

Xitay hökümiti yéqinqi mezgillerde izchil Uyghur diyaridiki wirus yuqumi toghrisida melumat bérip kéliwatqan bolup, az sanda éniq di'agnoz qoyulghan bimarlar sani tilgha élinip kelgenidi. Emma xitay miqyasidiki qamalni boshitish bilen tengla otturigha chiqqan tajsiman wirusining yamrishi melum bolghandin kéyin Uyghur diyaridiki yuqum ehwali heqqide yéngi sanliq melumatlar tilgha élinmighan.

Uyghur diyaridiki yuqum ehwali toghrisida ilgiriki waqitlarda “Wirusning menbesi shinjang” dégen qarash mu'eyyen derijide bazar tapqanliqi melum. Emma shu waqitlarda Uyghur diyarida yashawatqan bir qisim xitay puqraliri  ijtima'iy taratqularda söz qilip “Biz öydin chiqalmisaq wirus qandaqlarche shinjangdin ichkirige tarqilidu?” dep so'al qoyghan hemde Uyghur diyaridiki qamalning izchil dawam qiliwatqanliqini ashkarilap qoyghanidi.

Halbuki yéqindin buyan köplep melum boluwatqan uchurlar Uyghur diyaridiki wirus yuqumining ilgirikidinmu éghir boluwatqanliqini, yene kélip doxturxanilardiki dawalash we bashqa resmiyetlerni öteshte Uyghurlar bilen xitaylargha ashkara halda perqliq mu'amile qiliniwatqanliqini körsetken. Téximu muhimi hazir barghanséri yuqiri pellige chiqiwatqan wirus yuqumida Uyghur diyaridiki lagérlargha qamiwétilgen hemde mejburiy emgekke séliniwatqan Uyghur tutqunlarning hayati qandaq bolidighanliqi her sahe kishilirini jiddiy endishige salmaqta.