Xitay Uyghur éli ma'arip sahesige nechche milyard yüen meblegh salghanliqini bildürdi

Muxbirimiz jüme
2017-08-05
Share

Uyghur ana tilining Uyghur mektepliridin cheklen'genliki xewer qiliniwatqan mezgilde, xitay da'iriliri Uyghur éli ma'arip sahesige salghan mebleghlirining nechche milyard yüen'ge yetküzülgenlikini pesh qilishqa bashlidi.

Shinxu'a agéntliqining 4-awghust xewer qilishiche, 2014-yilidin buyan Uyghur éli ma'arip sahesige sélin'ghan omumiy meblegh 12 milyard 200 milyon yüen'ge yetken. Bu mebleghler Uyghur aptonom rayonining yéza-qishlaqliridiki ma'arip asasiy mu'essesilirini yaxshilashqa ishlitilgen. 

Xewerde bu mebleghlerning asasen "Xeterlik qurulushlarni chéqish, oqughuchilar yatiqi sélish we ma'arip üskünilirini sétiwélishqa ishlitilgen" liki körsitilgen. 

Xitay da'iriliri yéqinqi yillardin buyan Uyghur élidiki atalmish "Qosh til ma'aripi" gha sélinidighan mebleghnimu hessilep köpeytip, jenubiy Uyghur élini merkez qilghan rayonlarda qosh til yesli qurulushini keng kölemde kücheytken. 

Uyghur aptonom rayonluq ma'arip nazariti ötken yili dékabirdiki bayanatida Uyghur élide qosh tilliq yeslilerde oquwatqan oqughuchi sanining 2 milyondin ashqanliqi qosh tilliq yesli omumlishish nisbitining 90 pirsentke yetkenlikini bildürgen. 

Shinxu'a torining bu yil aprél xewer qilishiche, bu yilning özide xitay merkiziy hökümiti bilen Uyghur aptonom rayoni birliship "Qosh tilliq ma'arip" sahesige 28 milyard 960 milyon meblegh salidiken. 

Xitay hökümiti Uyghur élidiki atalmish "Qosh til ma'aripi" we bashqa ma'aripqa sélinidighan mebleghlirini hessilep köpeytken peytlerde, xoten wilayiti bir uqturush chiqirip, Uyghur tilining xotendiki barliq mekteplerde bir tutash cheklengenlikini, bundin kiyin xoten wilayiti tewesidiki ottura-bashlan'ghuch mekteplerde barliq derslerning xitay tilida oqulidighanliqini bildürgen.

Mezkur belgilimining pütün Uyghur aptonom rayoni miqyasida yolgha qoyulghanliqi, yaki xoten da'iriside cheklinidighanliqi hazirche delillenmigen bolsimu, emma mezkur xewer ötken hepte radi'omiz arqiliq ashkarilan'ghandin kéyin, xelq'ara axbaratlarda ghulghula qozghighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.