Уйғурларниң ген әвришкисиниң топлиниши хитайчә мәтбуатлардиму муназирә қозғиди

Мухбиримиз әзиз
2017.12.18

Хитай һөкүмитиниң уйғурлар диярида “һәқсиз саламәтлик тәкшүрүш” намида пүткүл уйғурларниң ген әвришкиси һәмдә биологийәлик учурлирини топлиши, шуниңдәк бу учурларни системилиқ шәкилдә архиплаштуруп чиққанлиқи өткән һәптидин буян дунядики һәрқайси чоң мәтбуатлардин кәң йәр алған иди. Нөвәттә бу һәқтики муһакимиләрниң чәтәлләрдики хитайчә ахбарат саһәсидиму қизиқ темилардин бири болуватқанлиқи мәлум.

Америкидики “бүйүк ера” тори бу һәқтики мәсилиләр һәққидә мутәхәссисләр билән сөһбәт уюштурған. Бу һәқтики сөһбәткә иштирак қилғучилардин бири америка уйғур бирләшмисиниң рәиси илшат һәсән: “хитайниң бу һәрикитидә биологийәлик қорал ясаш, уйғурларни орган көчүрүшниң мәнбәси қилиш, пүткүл уйғурларни контрол қилиш қатарлиқ үч мәқсәт көзләнгән” дәп көрсәткән.

Хитай сәһийә министирлики қармиқидики сағламлиқ тәрбийәси тәтқиқат мәркизиниң сабиқ мудири чен биңҗоң “бүйүк ера” ға қилған сөзидә “бәдән тәкшүртүштә пәқәт пәвқуладдә әһвал көрүлгәндила андин әвришкә топлиниду. Әвришкә топлашқа болса ғайәт зор мәбләғ сәрп қилиниду. Һөкүмәтниң һечнемидин һечнемә йоқ бунчә зор миқдарда пул хәҗләп әвришкә топлишида гуманлиқ нуқтилар бәк көп” дегән.

Бейҗиңдики инсан һәқлири паалийәтчиси ху җя бу һәқтә сөз қилип: “бу хилдики әвришкә топлашта адәттә җинайәтчиләр нишан қилиниду. Әмдиликтә пүткүл уйғурлар бу шәкилдә әвришкә топлашниң нишани болуп қалмақта” дегән. Шуниң билән биргә “муқимлиқни сақлаш” дегән нам астида бу тәдбирниң кейинчә тибәтләр вә хитай пуқралириғиму кеңийиш еһтимали барлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.