Уйғур елидә 2024-йиллиқ “кона өйләрни чеқип, йәр тәврәшкә чидамлиқ өй селиш” қурулуши тамамланған

Хитайчә “тәңритағ тори”, “шинҗаң гезити” ториниң 11-ноябир күни чиқарған хәвиригә қариғанда, хитай һөкүмитиниң 2024-йиллиқ “шинҗаңниң шәһәр-йезилиридики йәр тәврәшкә чидамлиқ өй қурулуши” тамамланған. Буниң ичидә, чарвичиларниң қишлиқ отлақ орунлирида 20 миң 850 туралғу вә мал қотанлири селинған болса, йәр тәврәш көп йүз беридиған наһийә-йезиларда “хәтәрлик өй” ләр чеқилип, йәр тәврәшкә чидамлиқ 24 миң 200 өй селинған.

 Хәвәрдә дейилишичә, йәр тәврәшкә чидамлиқ өй қурулушиниң муқим илгири сүрүлүшигә капаләтлик қилиш үчүн, йәрлик һөкүмәтләр 12 миңға йеқин кадирни нөвәт билән тәрбийәлигәндин башқа, қурулуш сүпитигә капаләтлик қилиш үчүн алақидар мутәхәссис вә техника хадимлирини нәқ мәйданға әвәткән. Буниңдин қариғанда, хитай һөкүмити һәр дәриҗилик кадирларни аһалиләргә хизмәт ишләшкә мәсул қилған болса, мутәхәссис вә техник хадимларни қурулуш ишлириға, йәни чеқиш вә селиш ишлириға мәсул қилған.

2024-Йил киргәндин буян хитайниң тик-ток, үндидар қатарлиқ иҗтимаий таратқулирида биңтүән вә йәрликтики һөкүмәт даирилириниң буйруқи билән һәр хил баһаниләрдә чеқиливатқан уйғур туралғулири вә өй игилириниң шикайәтлири баян қилинған син көрүнүшлири көпләп ашкарилинишқа башлиғаниди.

Уйғур елидә 2017-йилдин башлап әвҗигә чиққан лагерларға қамаш долқунида аилә бойичә тутқун қилинғанларниң қору-җайлириниң “кона өй, хәтәрлик өй” дәп чеқиветилгәнлики яки өзгәртилип хитай көчмәнлиригә бериветилгәнлики мәлум болғаниди. Лагер шаһити турсунай зиявудун ханимниң радийомизға билдүрүшичә, әйни чағда ғулҗиниң күнәс наһийәсиниң өзидила аилә бойичә тутқун қилинип лагерға қамалған нурғунлиған уйғурларниң игисиз қалған өй-җайлири тартивелинған яки чеқиветилгәникән.

Америкадики кишилик һоқуқ адвокати тең бявниң билдүрүшичә, гәрчә хитайниң қанунида пуқраларниң, өй-җай туралғу маканлирини қоғдаш һәққидә ениқ бәлгилимиләр болсиму, әмма хитайда қанун һәр вақит сиясәткә бойсунғанлиқи үчүн бу хил қанунлар әмәлийәттә иҗра қилинмайдикән.