Америка толуқ оттура мәктипидики уйғур оқуғучилириниң йеңи ғәлибиси
2016.04.20
19-Апрел күни америкиниң вирҗиния штатидики октон толуқ оттура мәктипидә оқуватқан уйғур оқуғучиларни өз ичигә алған бир гуруппа оқуғучилар ясап чиққан машина адәм модели вирҗиния вә марийланд штатидики таллаш мусабиқисидә нәтиҗигә еришти.
Мәзкур оқуғучилар гурупписи ясап чиққан “риккий боббй” исимлик машина адәм оқуғучиларниң инженерлиқ билими, һәмкарлиқ роһи һәмдә иҗадчанлиқиниң ортақ мәһсули. Мәзкур гуруппида қәйсәр бәхтияр вә җәсур җүрәт исимлик икки уйғур пәрзәнти болуп, уларниң бу нәтиҗиси америкидики уйғур җамаитиниң махтишиға сазавәр болди.
Мәзкур мусабиқини “FIRST” намлиқ хәлқара өсмүрләр тәшкилати орунлаштурған болуп, бу тәшкилат яш- өсмүрләрниң илим пән қизғинлиқиға илһам бериш һәмдә уларни инженерлиқ саһәсигә риғбәтләндүрүшни өзигә нишан қилған. Бу қетимқи мусабиқидә утуп чиққан октон толуқ оттура мәктипи оқуғучилар гурупписи мушу айниң 27-күнидин 30-күнигичә саинт луйиз шәһиридә өткүзүлидиған һәл қилғуч мусабиқигә қатнишиду.