“Shinjang tokini ichkirige yetküzüsh” qurulushi ghayet zor kölemge yetken

“Xitay xewerliri tori” ning 19-may küni chiqarghan xewirige qarighanda, “Shinjang tokini ichkirige yetküzüsh” qurulushi bashlan'ghandin buyan hazirghiche, Uyghur rayonidin ichkiri xitaygha toshulghan tokning miqdari jem'iy 640 milyard kilowatqa yetken.

“Shinjang tokini ichkirige yetküzüsh” qurulushining birinchi tok yoli qumuldin dunxu'angghiche bolup, 2010-yil 11-ayda tamamlan'ghan؛ ikkinchi tok yoli dunxu'angdin shajoghiche bolup, 2013-yil 6-ayda tamamlan'ghan؛ qumuldin jéngjughiche yuqiri bésimliq tok yoli 2014-yil 1-ayda tamamlan'ghan bolup, “Shinjang bilen ottura tüzlenglikni tutashturghuchi éléktr yipek yoli” dep atalghan. Dunya boyiche eng yuqiri bésimliq we eng köp miqdarliq tok yoli sherqiy jungghariyedin jenubiy enxuy nahiyelirigiche tutashturulghan tok yoli bolup, Uyghur rayoni bilen ichkiri xitay arisidiki muhim éléktr torigha aylan'ghan.  Bu yil xitay hökümiti yene qumulning shimalidin chungchingghiche bolghan üchinchi tok yolini qurushni pilanlawétiptu.

Melumatlargha qarighanda, hazir Uyghur rayoni xitayning eng muhim énérgiye ishlepchiqirish bazisigha aylan'ghan bolup, néfit tebi'iy gaz, kömür bayliqida xitay boyiche birinchi, quyash we shamal énérgiyesi bayliqida ikkinchi orunda turidiken. Xitay hökümiti ichkirige teminlewatqan tok asasen kömürni yéqilghu qilidighan ot éléktr istansisi bolup, muhitni bulghash derijisi eng éghir hésablinidiken.

Dunya Uyghur qurultiyining bayanatchisi dilshat rishit radiyomizgha qilghan sözide, xitayning bu pilanining Uyghur rayonining ékologiyelik muhitini buzup, hawasini bulghap, yerlik ahalilerge ziyan élip kélidighanliqini bildürgenidi.