Amérika dölet mejliside xitayning Uyghur irqiy qirghinchiliqining jawabkarliqini sürüshtürüsh we jazalash qanun layihesi sunuldi

Washin'gtondin muxbirimiz erkin teyyarlidi
2024.04.26

Amérika dölet mejlisi Uyghur guruppisining qosh re'isliridin, jumhuriyetchi we démokratik awam palata ezasi kristofér simit bilen tom sozi, xitayning “Uyghur irqiy qirghinchiliqining jawabkarliqini sürüshtürüsh we jazalash qanun layihesi” sun'ghan. Kristofér simitning ishxanisi 24-aprél élan qilghan bayanatta qeyt qilinishiche, bu qanun layihesi “Xitay kompartiyesining hazirmu dawamlishiwatqan Uyghur irqiy qirghinchiliqigha qarshi turushni téximu kücheytish” ni meqset qilghan iken. Bu qanun layihesi ötken hepte amérika dölet mejliside Uyghur guruppisining qurulushining arqisidinla sunulghan. Melum bolushiche, “Simit-sozi qanuni” dep atalghan qanun layiheside, “2020-Yili maqullan'ghan ‛Uyghur kishilik hoquq siyasiti qanuni‚ téximu kücheytilgen, shundaqla mewjut jazalash tedbirlirini kéngeytip, xitay emeldarlirining shinjang Uyghur aptonom rayonidiki Uyghur we bashqa az sanliq milletlerge qarshi sadir qilghan qorqunchluq kishilik hoquq wehshiyliklirini jawabkarliqqa tartishqa kapaletlik qilish” otturigha qoyulghaniken.

Kristofér simit, bu halqiliq qanunning “Shi jinping we xitay kompartiyesi teripidin Uyghur we bashqa asasliqi musulman ottura asiya xelqlirige qaritilghan mejburiy emgektin, Uyghurlarning ichki ezalirini mejburiy élishqiche bolghan qorqunchluq depsendichilikni toxtitishqa yardem béridighanliqi” ni éytqan. Tom sozi, bu qanun layihesi ularning “Bu jinayetni sadir qiliwatqan xitay emeldarlirini jazalash tirishchanliqini kéngeytish, kishilik hoquq depsendichilikini höjjetleshtürüshke téxnikiliq yardem béridighanliqi” ni bildürgen. Melum bolushiche, “Simit-sozi qanun layihesi” jumhuriyetchi we démokratik kéngesh palata ezaliridin marko rubi'o bilen jéf merkléyning buningdin burun sun'ghan qanun layihesi bilen oxshashliqqa ige iken. Her ikki qanun layiheside amérikadin xitayning Uyghurlarning beden ichki ezalirini mejburiy élishigha qarshi istratégiye tüzüshi telep qilin'ghan. “Simit-sozi qanun layihesi” amérika tashqi ishlar ministiri bilinkén xitayda ziyarette boluwatqan bir peytte sunulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.