Хитай даирилири 10-айда уйғур районидин 91 нәпәр кадирниң делоси бир тәрәп қилинғанлиқини елан қилған

Мухбиримиз нуриман
2021.11.26
Share on WhatsApp
Share on WhatsApp

Йеқинқи бирқанчә йилдин буян хитай компартийәси мәмликәт бойичә кадирлар системисини тазилашни вә тәртипкә селишни күчәйткән. Болупму уйғур районида “мәркәзниң 8 түрлүк бәлгилимиси” гә хилаплиқ қилған дегән баһанә билән һәр дәриҗилик кадирларға болған назарәт вә тазилашни мислисиз дәриҗидә кеңәйткәнлики мәлум болмақта.

Хитайниң башқурушидики “тәңритағ” тори, “хәлқ тори” һәмдә “биңтуән хәвәрлири” ториниң бүгүн тарқатқан хәвиригә қариғанда, хитай даирилири 10-ай бир ай ичидә уйғур районида “мәркәзниң 8 түрлүк бәлгилимисигә хилаплиқ қилған” дегән җинайәт билән җәмий 91 нәпәр әмәлдарниң делосини бир тәрәп қилған. Хәвәрдә гәрчә бир тәрәп қилинған бу 91 нәпәр кадирниң милләт тәвәлики тилға елинмиған болсиму, әмма уларниң ичидә хели көп қисминиң уйғур вә башқа йәрлик милләт кадирлири икәнлики пәрәз қилинмақта. Хәвәрдә йәнә бир тәрәп қилинған әмәлдарлар ичидә 2 нәпириниң назарәт дәриҗилик, 5 нәпириниң наһийә-башқарма дәриҗилик, қалғанлириниң йеза вә бөлүм дәриҗилик әмәлдарлар икәнлики тилға елинған.

Хитай һөкүмәт таратқулириниң бу һәптә бәргән хәвәрлиридә уйғур аптоном районлуқ деһқанчилиқ вә йеза назаритиниң назири турсунҗан әлиниң “тәкшүрүш” кә елинғанлиқи уқтурулған иди. Уйғур райониниң вәзийитигә йеқиндин диққәт қилип келиватқан көзәткүчиләр вә сиясий анализчилар, йеқинқи йиллардин буян уйғур районида “дело турғузулуп тәкшүрүшкә елинған” яки “бир тәрәп қилинған” уйғур кадирлириниң көпинчисиниң сиясий сәвәбләрдин тутқун қилинғанлиқини, хитай әмәлдарлириниң болса “парихорлуқ” яки “чириклик” сәвәбидин бир тәрәп қилиниватқанлиқини илгири сүрмәктә. Көзәткүчиләрниң илгири сүрүшичә, бу йил 10-айда, йәни қисқиғинә бир ай ичидә уйғур районидин 91 нәпәр әмәлдарниң бир тәрәп қилиниши, хитайниң уйғур районидики йоқури бесимлиқ сиясити вә тазилаш һәрикитиниң қайсий дәриҗигә йетип барғанлиқини ениқ көрситип беридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.