Uyghur élidin xitay ölkilirige toshup kétilgen omumiy tok miqdari 740 milyard 800 milyon kilowat sa'etke yetken

Xitayning hökümet taratquliridin tarqitilghan xewerdin qarighanda, Uyghur éli xitay ölkilirini teminligen omumiy tok miqdari 740 milyard 800 milyon kilowat sa'etke yetken.

Melum bolushiche, bu pütün xitaydiki 1 milyard 400 milyon adem 230 kün ishliteleydighan tok miqdarini körsitidiken hemde yene 224 milyon 90 ming tonna ölchemlik kömürni köydürgen'ge barawer iken.

Xitay hökümiti 2010-yilidin bashlap “Gherbning tokini sherqqe yötkesh” istratégiyesi yolgha qoyulup 12 yildin kéyin, Uyghur éli xitay ölkilirini tok bilen teminleydighan eng chong “Éléktir istansisi” gha aylan'ghanidi.

Melum bolushiche, “Gherbning tokini sherqqe yötkesh” pilanidiki éléktir istansilirining mutleq köp qismi kömür éléktir istansisi bolup, muhitni qoghdighuchilar bunchilik köp tok ishlepchiqirishta serp qilinidighan kömür serpiyatining hawa, su we ékologiyelik muhitini téximu éghir buzghunchiliqqa uchritidighanliqini agahlandurup kelgen.

Derweqe yuqiridiki xewerdimu, xitay ölkilirige toshulghan bu 740 milyard 800 milyon kilowat sa'et tokning peqet ottuz pirsentining yéshil énérgiye ikenliki qeyt qilin'ghan.

Xewerde yene, Uyghur élining “Kömür, shamal, quyash énérgiyesi qatarliq énérgiye bayliqi boyiche xitayning muhim uniwérsal énérgiye bazisi ikenliki” tekitlinip, énérgiye yetküzüsh qurulush türlirining dawamliq tamamliniwatqanliqi tilgha élin'ghan.