Uyghur mejburiy emgiki téma qilin'ghan resim körgezmisi nyu-yorkta bashlandi

Washin'gtondin muxbirimiz irade teyyarlidi
2024.04.16

Uyghur mejburiy emgiki téma qilin'ghan resim körgezmisi 16 – ayril küni nyu-yorkta bashlandi. Körgezmige “Xitayda ishlen'gen: siz yaxshi köridighan markilar Uyghur mejburiy emgikidin qandaq payda éliwatidu” dep mawzu qoyulghan bolup, uni “Yehudiy chong qirghinchiliqi” din aman qalghan yazghuchi, nobél mukapati sahibi éliy wizel (Elie Wiesel) namida qurulghan “Éliy wizel fondi” orunlashturghan.

“Éliy wizel fondi” 16- ayril küni X ke yollighan uchurida mundaq dégen:

“Nechche onlighan markilar sherqiy türkistandiki Uyghur xelqining dölet mejburlishidiki emgek küchidin paydilinidighan teminlesh zenjirige chétilghan. Emdi bu tawarlar üchün qurban qiliniwatqanlarni ashkarilaydighan hemde insanlarni markilargha bésim ishlitishke ündeydighan peyt keldi.”

Mezkur fondi jem'iyet uchurida yene, kishilerni “Uyghurlarning hékayilirige érengshimeydighan we mejburiy emgektin payda alidighan shirketlerni ashkarilaydighan sen'et eserliri körgezmisige qedem teshrip qilishqa” teklip qilghan.

16- Ayril küni bashlan'ghan bu resim körgezmisi eslide “Éliy wizel fondi”, dunya Uyghur qurultiyi we Uyghur kishilik hoquq qurulushi bilen birlikte orunlashturghan we nyu-york shehiride échilish aldida turghan “Uyghur irqiy qirghinchiliqini toxtitish” témiliq muhakime yighinining bir parchisi bolup, u, 4-ayning 17-, 18-künliri échilidighan yighinning muqeddimisi bolup hésablinidiken.

Ikki kün dawam qilidighan yighin'gha amérika tashqi ishlar ministirliqi irqiy qirghinchiliq mesilisi alahide elchisi éllén gérmayn (Ellen Germain), shundaqla nopuzluq islam ölimaliri we yehudiy rabiyliridin bashqa yene, manxattin instituti irqiy qirghinchiliq we dinlar ara tetqiqat merkizi, amérika yehudiy chong qirghinchiliqi muzéyi qatarliq orunlar qatnishidighanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.