Pirézidént baydin xitay emeldarlirini jazalash we Uyghur mejburiy emgek mehsulatlirini chekleshni qayta uzartti

Washin'gtondin muxbirimiz erkin teyyarlidi
2024.12.31

Amérika pirézidénti jow baydin 2025-yili kirish harpisida, amérikaning xitay emeldarlirini jazalash tedbiri we amérika fédératsiye apparatlirining Uyghur mejburiy emgek mehsulatlirini sétiwélishini chekleshni uzartishqa da'ir ikki qanun maddisigha imza qoyghan. Bu qanun maddiliri amérikaning 2025-yilliq “Dölet mudapi'esige hoquq bérish qanuni” gha kirgüzülgen bolup, pirézidént baydin bu qanun'gha 22-dékabir imza qoyghan. Melum bolushiche, xitay hökümet emeldarlirigha qaritilghan “Magnitiskiy kishilik hoquq jazasi” ning bu shekilde qayta uzartilishi 2020-yili 6-ayda maqullan'ghan hemde 2025-yili sürüki toshidighan “Uyghur kishilik hoquq siyasiti qanuni” ning az dégende yene 10 yil dawamlishishini ishqa ashuridiken.

Pirézidént baydin bu qétim imza qoyghan “Dölet mudapi'esige hoquq bérish qanuni” mezmun jehette “Uyghur kishilik hoquq siyasiti qanuni” gha qayta hoquq bérish, shuningdek tibet, xongkong hem Uyghur élige munasiwetlik bezi qanunlargha asasen jaza yürgüzüshke qayta hoquq bérish qatarliq maddilarni öz ichige alidu.

Melum bolushiche, “Uyghur kishilik hoquq siyasiti qanuni” gha qayta hoquq bérish layihesini 2024-yili 6-ayda kéngesh palata ezasi marko rubiyo bilen jéf mérkiléy otturigha qoyghan. Tibet, xongkong hem Uyghurlargha munasiwetlik bezi qanunlar boyiche jaza yürgüzüshke qayta hoquq bérish layihesini awam palata ezasi kiristofér simit we jéymis mékgowérin otturigha qoyghan bolup, dén filips we joy wilson qatarliq palata ezalirining qollishigha érishken.

Mezkur qanun maddisi tunji qétim amérika dölet mudapi'e ministirliqining dunyaning herqandaq yéridin Uyghur mejburiy emgikige chétishliq mehsulatlarni sétiwélishini chekleydu. Pirézidént baydinning mezkur qanun'gha imza qoyushi “Uyghur kishilik hoquq qurulushi” ning qarshi élishigha érishken. Mezkur teshkilat 30-dékabir élan qilghan bayanatida, “Buning Uyghurlar üchün bir ümid sowghisi” bolup qalidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.