Mutexessisler “Uyghur mejburiy emgikining aldini élish qanuni” ni qattiq ijra qilishni ghelibe qazinishtiki achquch, dep körsetti

Washin'gtondin muxbirimiz irade teyyarlidi
2023.11.28

Amérika xelq'ara soda komitétining sabiq komissari di'an pinkért (Dean Pinkert) we shundaqla “Uyghur mejburiy emgikini axirlashturush hemkarliqi” guruppisining teshwiqat yétekchisi sharlot taté (Charlotte Tate) “Teminlesh zenjiri” (Sourcing Journal) namliq zhurnalda maqale élan qilip, Uyghur mejburiy emgikining aldini élish qanunini qattiq ijra qilishning muhimliqini, qanun qattiq bolghandila Uyghur mejburiy emgikige ünümlük taqabil turghili bolidighanliqini bildürgen.

Maqalide déyilishiche, “Uzundin buyan nurghun shirketler kishilik hoquq depsendichiliki bilen tolghan teminlesh zenjirliridin payda alghan, bextke yarisha amérika hökümiti dunyada tunji bolup “Uyghur mejburiy emgikining aldini élish qanuni” ni yolgha qoyup bashlamchiliq rol oynighandin kéyin amérika tamozhna we chégra qoghdash idarisi kem dégende 10 dölettin minglighan yollanmini toxtatqan. Bu mehsulatlar küntaxta, kiyim-kéchek, asasi métal we déhqanchiliq mehsulatlirini öz ichige alidighan bolup, 2023-yili 3-aygha qeder, Uyghur rayonidin amérikagha kélidighan yollanmilar 90 pirsent azayghan.”

Maqale aptorliri, xitaydiki teminlesh zenjirliridin mal kirgüzüwatqan shirketlerning teminlesh zenjirlirini yötkesh jeryanida körülidighan azghine qiyinchiliqlirini dep “Uyghur mejburiy emgikining aldini élish qanuni” ning ijra qilinishigha tosqunluq qilmasliqqa, herqandaq mehsulatning Uyghur mejburiy emgiki bedilige yasalghanliqtek éhtimalini közde tutup turup heriket qilishqa chaqirghan. Ular maqalisini töwendiki jümle bilen ayaghlashturghan: “Hazir dölet yürgüzüwatqan mejburiy emgek siyasiti tüpeylidin japa tartiwatqanlardin yüz örüydighan waqit emes. Chünki ularning qiyinchiliqi bu shirketler duch kéliwatqan maslishish qiyinchiliqidin nechche hesse zor. ”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.