Iqtisad géziti: “‛Uyghur mejburiy emgikining aldini élish qanuni‚ paychiki shirketlirini ensiritiwatidu”

Washin'gtondin muxbirimiz uyghar teyyarlidi
2024.05.22

Amérika kéngesh palatasi 2024-yili 5-ayning 20-küni BMW, jagu'ar lendirowr ( Jaguar Land rover), wolkiswagén (Volkswagen) qatarliq aptomobillarda Uyghur mejburiy emgiki barliqini jezmleshtürgenidi. Amérika kéngesh palatasining maliye komitéti otturigha qoyghan bu doklatta, aptomobil shirketlirining amérikada Uyghur mejburiy emgiki bilen chétishliq bolup cheklen'gen teminligüchi shirketlerdin mashina zapchasliri élip ishletkenliki tüpeyli ularni jazalash telep qilghan. Bu ehwal Uyghur mejburiy emgiki bilen chétishliq bolghan shirketlerdin paychiki alghan shexs we orunlarnimu ensiritiwatqanliqi ilgiri sürülmekte.

Démokratlar partiyesidin kélip chiqqan kéngesh palata ezasi ron waydén amérikada cheklen'gen teminligüchi shirketlerdin mashina zapchasliri import qilghan shirketlerge qarita qilghan sözide mundaq dégen: “Men tamozhna we chégra qoghdash idarisidin bir qatar konkrét tedbirlerni qollinip, qattiq tekshürüsh élish bérish we mejburiy emgekni nomussizlarche ishlitiwatqanliqi éniqlan'ghan shirketlerge bésim qilishqa chaqirimen” .

 “Iqtisad géziti” (The Financial Times) ning 22-maydiki xewirige asaslan'ghanda amérika kéngesh palatasi maliye komitétining bu doklatni élan qilishi amérikadiki her ikki partiyediki siyasiyonlarning xitayda yüz bériwatqan kishilik hoquq depsendichiliki we bu depsendichilikke shérik bolghan shirketlerni jazalash arzusining küchlük ikenlikni körsitip béridiken. Shuning bilen waqitta “Uyghur mejburiy emgikining aldini élish qanuni” ning Uyghur mejburiy emgiki bilen chétishliq bolghan shirketlerdin paychiki alghan shexs we orunlarnimu ensirewatqanliqi ilgiri sürülgen.

 Amérika pirézidénti jo baydén imza qoyghan “Uyghur mejburiy emgikining aldini élish qanuni” 2022-yili 21-iyundin bashlap resmiy ijra qilinishqa bashlighan. Mezkur qanun'gha asasen Uyghur diyarida ishlepchiqirilip, amérikagha import qilinidighan her qandaq mehsulatning Uyghur mejburiy emgiki bilen chétishliqi yoqluqi qayil qilarliq deliller bilen ispatlanmighuche, amérika bazirigha kérishi cheklen'genidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.