Хәлқара таратқулар йеңи йил кириши билән уйғур вәзийитигә йеқиндин диққәт қилмақта

Мухбиримиз қутлан
2017.01.02

2017-Йили кириши билән хәлқара таратқулар сиясий вәзийити барғансери җиддийлишип бериватқан уйғур дияри вә бу йәрдики юқири бесимлиқ сиясий чәклимә ичидә яшаватқан уйғурлар вәзийитигә йеқиндин диққәт қилмақта.

Мәлум болушичә, йеңи йилниң биринчи күни “нюйорк вақит гезити”, “дипломат” вә башқа дуняви чоң таратқуларда уйғурлар вәзийитигә даир хәвәрләр орун алған. Буларниң ичидә “оттура асия вақти” гезитидә гари сандс исимлик бир мухбирниң 2-январ күни елан қилған “сәпәр чәклимилири билән елишиватқан уйғурлар” намлиқ мақалиси алаһидә диққәт қозғайду.

Мақалидә уйғурлар йеқинқи бирқанчә йил мабәйнидә дуч кәлгән сиясий тәқибләр һәмдә уларниң хитайниң юқири бесимлиқ сиясий реҗимиға көрсәткән қаршилиқлири санап өтүлгән.

Болупму уйғурларниң диний етиқад әркинликигә қоюлған қаттиқ чәклимиләр, паспорт алалмаслиқ яки берилгән паспортлириниң йиғивелиниши, “омумий хәлқ саламәтлик тәкшүрүши” дегән нам билән уларниң қан вә д н а өрникиниң архиплаштурулуши, хитай көчмәнлириниң уйғур елиға түркүмләп йәрләштүрүлүши вә уйғур әмгәк күчлирини хитай өлкилиригә тарқақлаштуруши, райондики асаслиқ йәрлик аһалә болған уйғурларниң сиясий вә иқтисадий җәһәттин чәтләштүрүлүши қатарлиқ мәсилиләр бир-бирләп тилға елинған.

Мақалидә юқириқи амилларниң уйғурларни хитай тәкитләватқан “әбәдий әминлик” яки “милләтләр иттипақлиқи” йолиға әмәс, бәлки техиму радикаллиқ яки қораллиқ қаршилиқ көрситиш йолиға мәҗбурлайдиғанлиқи алаһидә әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.