Xelq'ara taratqular yéngi yil kirishi bilen Uyghur weziyitige yéqindin diqqet qilmaqta

Muxbirimiz qutlan
2017-01-02
Élxet
Pikir
Share
Print

2017-Yili kirishi bilen xelq'ara taratqular siyasiy weziyiti barghanséri jiddiyliship bériwatqan Uyghur diyari we bu yerdiki yuqiri bésimliq siyasiy cheklime ichide yashawatqan Uyghurlar weziyitige yéqindin diqqet qilmaqta.

Melum bolushiche, yéngi yilning birinchi küni "Nyuyork waqit géziti", "Diplomat" we bashqa dunyawi chong taratqularda Uyghurlar weziyitige da'ir xewerler orun alghan. Bularning ichide "Ottura asiya waqti" gézitide gari sands isimlik bir muxbirning 2-yanwar küni élan qilghan "Seper cheklimiliri bilen élishiwatqan Uyghurlar" namliq maqalisi alahide diqqet qozghaydu.

Maqalide Uyghurlar yéqinqi birqanche yil mabeynide duch kelgen siyasiy teqibler hemde ularning xitayning yuqiri bésimliq siyasiy réjimigha körsetken qarshiliqliri sanap ötülgen.

Bolupmu Uyghurlarning diniy étiqad erkinlikige qoyulghan qattiq cheklimiler, pasport alalmasliq yaki bérilgen pasportlirining yighiwélinishi, "Omumiy xelq salametlik tekshürüshi" dégen nam bilen ularning qan we d n a örnikining arxiplashturulushi, xitay köchmenlirining Uyghur éligha türkümlep yerleshtürülüshi we Uyghur emgek küchlirini xitay ölkilirige tarqaqlashturushi, rayondiki asasliq yerlik ahale bolghan Uyghurlarning siyasiy we iqtisadiy jehettin chetleshtürülüshi qatarliq mesililer bir-birlep tilgha élin'ghan.

Maqalide yuqiriqi amillarning Uyghurlarni xitay tekitlewatqan "Ebediy eminlik" yaki "Milletler ittipaqliqi" yoligha emes, belki téximu radikalliq yaki qoralliq qarshiliq körsitish yoligha mejburlaydighanliqi alahide eskertilgen.

Toluq bet