Кишилик һоқуқ тәшкилатлири хәлқарани уйғурларни хитайға қайтурмаслиқ тоғрисида җиддий тәдбир қоллинишқа чақирди

Мухбиримиз әркин
2022.06.17
Share on WhatsApp
Share on WhatsApp

Хәлқарадики 20 дин артуқ мусапирлар вә кишилик һоқуқ оргини, 50 тин артуқ уйғур тәшкилати 17-июн, дуня мусапирлар күни һарписида ортақ хитабнамә елан қилип, һәр қайси һөкүмәтләр вә хәлқаралиқ органларни хитайға қайтурулуш хәвпи астидики уйғур вә башқа түркий милләтләрни қоғдаш үчүн җиддий тәдбир елишқа чақирған. Чақириқта: “хитайниң уйғур районида кәң көләмлик тутуп туруш, мәҗбурий әмгәк вә қийнашни өз ичигә алған вәһший җинайи қилмишлирини қанат яйдуруш билән бир вақитта, кишилик һоқуқ қоғдиғучилирини өз ичигә алған хитай сиртидики уйғурларниң хәлқаралиқ қоғдаштин мәһрум қелиш вә қайтурулуш хәвпигә қелиштәк тосқунлуқларға дуч келиватқанлиқи” әскәртилгән.

Мәлум болушичә, бу хитабнамигә дуня уйғур қурултийи, вакаләтсиз милләтләр вә хәлқләр тәшкилати, кишилик һоқуқни һимайә қилғучиларни қоғдаш тәшкилати, хәлқара мусапирлар тәшкилати, мусапирлар қурултийи, оттура-шәрқ вә шималий ‍африқа һоқуқ тәшкилати, тән җазаси қурбанлири мәркизи, уйғур кишилик һоқуқ қурулушини өз ичигә алған 70 нәччә аммиви тәшкилләт имза қойған. Һәр йили 20-июн б д т ниң дуня мусапирлар хатириләш күни болуп, б д т мусапирлар мәһкимиси бу йилни мусапирларниң бихәтәрлик һәқлиригә мәркәзлишиш йили, қилип бекиткән иди.

Лекин 70 нәччә тәшкилатниң 17-июн елан қилған чақириқида мундақ дейилгән: “3-дөләттә муқим олтурақлишип болалмиған уйғурлар тутқун қилиниш вә (хитайға) қайтурулуштәк пәвқуладдә хәвпкә дуч кәлмәктә. Улардин нурғунлири даим хитай даирилириниң тәлипи билән йәрлик даириләрниң паракәндичилики вә қорқутушиға учрап кәлди, бәзи әһвалларда узун мәзгил тутуп турулди.”

Чақириқта көрситилишичә, һөкүмәтләр қайтурулуш хәвпидики уйғурларға қарита актиплиқ билән мусапирларни орунлаштуруш программисини йолға қоюп, җиддий қайтурулуш хәвпидики делоларға диққәт қилиши, һөкүмәтләр хитайниң уйғурларни нишан қилған җинайи ишлар әдлийә һәмкарлиқ тәләплирини рәт қилиши, шундақла хитайниң хәлқара санлиқ мәлумат амбарлирини уйғур вә башқа түркий милләтләргә қарши ишлитишиниң алдини актиплиқ билән елиши керәк икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.