Америка һөкүмити “шинҗаң мәсилиси” дә банкиларни техиму қаттиқ назарәткә алған

Америка һөкүмитиниң йеқинда елан қилған уйғурлар тоғрисидики “сода көрсәтмиси” дә банкиларниң техиму қаттиқ назарәткә елинғанлиқи илгири сүрүлди. “йәршари сода тәқризи” ториниң хәвәр қилишичә, байден һөкүмити “сода көрсәтмиси” дә банкиларни шинҗаңдики мәҗбурий әмгәкни өз ичигә алған тәминат зәнҗири мәсилисидә техиму қаттиқ назарәт қилидиғанлиқиниң сигналини бәргән.

Американиң бир қанчә министирлиқи 13-июл һөкүмәтниң “сода көрсәтмиси” ни йеңилап, америка ширкәтлириниң уйғур елидики кишилик һоқуқ дәпсәндичиликигә четилип қелишниң қануни җавабкарлиқи барлиқини агаһландурған. Бу американиң тунҗи қетим “сода көрсәтмиси” дә банкиларни агаһландуруши иди. “йәршари сода тәқризи” ниң ейтилишичә, “сода көрсәтмиси” дә банкиларниң банка мәхпийәтлики қануни бойичә (BSA) пул-муамилә содиси яки пул ‍алмаштурушта вә яки башқа мувапиқ усуллар арқилиқ байқалған адәм әткәсчиликигә аит гуманлиқ һәрикәтләрни мәлум қилиш мәҗбурийити барлиқи тәкитләнгәникән.

“сода көрсәтмиси” дә йәнә “америка банкиси яки у арқилиқ сода қилидиған орунларниң кәсипдашлири, шериклири яки тармақ ширкәтлири билән алақилишип, американиң шинҗаң мәсилисидики тәләплириниң уларға қандақ тәсир көрситидиғанлиқини чүшиниши тәләп қилинғаникән. “йәршари сода тәқризи” ниң ейтилишичә, кишилик һоқуқ адвокатлири шу сәвәблик “банка мәхпийәтлик қануниниң шинҗаң мәсилисигә техиму көп тәдбиқлинидиғанлиқи” ни ейтқан.