Бейҗиң американиң җазаси астидики "шинҗаңни техиму қоллаш" ниң сигналини бәргән

Мухбиримиз әркин
2021-07-23
Share

Ақсу шәһиридә ечилған хитайниң 7-нөвәтлик "шинҗаңға нишанлиқ ярдәм бериш" йиғинида бейҗиң, уйғурларға қарита елип берилған "ирқий қирғинчилиқ" түпәйли американиң җазасиға учриған бу районни техиму қоллайдиғанлиқиниң сигналини бәргән. Хитайниң бу нөвәтлик "шинҗаңға нишанлиқ ярдәм бериш" йиғини америка дөләт мәҗлиси вә һөкүмити уйғур елидә ишләпчиқирилған мәһсулатларни чәкләштә һалқилиқ қәдәмләрни атқан бир вақитта чақирилғаниди.

"җәнубий хитай сәһәр почтиси" гезитиниң хәвәр қилишичә, 21-июл күни ахирлашқан 3 күнлүк йиғинда хитай компартийәси мәркизи комитети сиясий бюросиниң даимий әзаси, мәркизи шинҗаң хизмити рәһбәрлик гурупписиниң башлиқи ваң яң сөз қилип, бейҗиңниң мәзкур районға техиму көп селинма аҗритишқа тәйяр икәнликини билдүргән.

Америка кеңәш палатаси уйғур елидә ишләпчиқирилған мәһсулатларни импорт қилишни чәкләш тоғрисидики "уйғур мәҗбурий әмгикиниң алдини елиш қанун лайиһәси" ни бирдәк муқуллиған шундақла байден һөкүмити хитайниң уйғур елидики қуяш енергийә тахтиси ширкәтлирини җазалап, америка ширкәтлирини бу район билән сода қилишниң қануни җавабкарлиқи барлиқини агаһландурған.

"җәнубий хитай сәһәр почтиси" гезитиниң ейтишичә, ваң яң йиғинда йәнә "шинҗаңға нишанлиқ ярдәм бериш программиси мәркәзниң бәргән зор сиясий вәзиписи" дегән. Хәвәрдә билдүрүлүшичә, мутәхәсиссләр ваң яңниң сөзиниң хитайниң һазирқи сияситидә чоң өзгириш болмиғанлиқини көрситидиғанлиқини ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт