Amazon, alma, féysbuk we gugul shirketliri Uyghurlargha yürgüzülüwatqan mejburiy emgekke qarshi turidighanliqini bildürdi

Muxbirimiz irade
2020-07-30
Élxet
Pikir
Share
Print

Amérikaning amazon, alma, féysbuk we gugul qatarliq 4 chong gigant shirkitining ijra'iye emeldarliri (CEO) 29-iyul küni amérika dölet mejliside yuqiriqi bu shirketlerning heqsiz riqabet, uchurni qamal qilish, qollan'ghuchi uchurlirini qalaymiqan ishlitish qatarliq bir qatar mesililiri boyiche dölet mejlis ezalirining so'allirigha jawab berdi.

Mezkur guwahliq bérish yighinida ular dölet mejlisi ezalirining küchlük we qéyin so'allirigha duch keldi we u heqte chüshenche berdi. Shular qatarida Uyghurlargha ijra qiliniwatqan mejburiy emgek mesilisimu bar bolup, ular yighinda xitaydiki mejburiy emgekke qet'iy qarshi turidighanliqi we mejburiy emgek asasida ishlep chiqirilghan herqandaq mehsulatni almaydighanliqi heqqide wede berdi.

Yighinda amérika awam palata ezasi ken bak xitay hökümitining Uyghur musulmanlirigha qaratqan mejburiy emgek we yaki qul emgikidin payda éliwatqan 80 din artuq xelq'araliq shirket barliqini, bu seweblik aldinqi hepte amérika dölet mejliside amérika shérketlirini mejburiy emgek asasidiki teminlesh zenjirliridin cheklesh heqqide bir qanun layihesi tonushturulghanliqini bayan qildi we yuqiriqi shirket bashliqliridin "Siler özünglarning mejburiy emgekke baghlinishliq bolghan mallarni ishletmeydighanliqinglargha kapaletlik qilalamsiler?" dep soridi. Buninggha yuqiriqi emeldarlarning herbiri ayrim-ayrim halda öz shirketlirining buninggha qet'iy qarshi turidighanliqini we hergiz mejburiy emgektin mal teminlimeydighanliqi heqqide wede berdi.

Melum bolushiche, amérika dölet mejliside yuqiriqi guwahliq bérish yighini ötküzülüwatqanda bir qisim tibet we Uyghur yashliri birlikte namayish qilip, yuqiriqi shirketlerning xitay bilen bolghan hemkarliqigha naraziliq bildürgen.

Toluq bet