Amérika we uning ittipaqdashliri b d t da Uyghurlar weziyitini muzakire qilishni telep qildi

Muxbirimiz erkin
2022.09.26
Share on WhatsApp
Share on WhatsApp

Amérika we uning ittipaqdashliri 26-séntebir küni b d t kishilik hoquq kéngishide Uyghurlar weziyitini muzakire qilish toghrisida bir teklip layihesi sun'ghan. Firansiye agéntliqining xewer qilishiche, diplomatlar teklip layihesini amérikaning sun'ghanliqi, lékin uninggha qoshumche en'gliye, kanada, daniye, finlandiye, islandiye, norwégiye, shiwétsiye qatarliq döletlerning imza qoyghanliqi, imza qoyidighan döletlerning yene köpiyishi mumkinlikini bildürgen. Bu döletler yene ukra'inagha qoralliq hujum qilghan rusiye üstidinmu tekshürüsh élip bérish toghrisida teklip layihesi sun'ghan.

Firansiye agéntliqining xewiride, b d t xewpsizlik kéngishining da'imiy ezasi bolghan ikki küchlük dölet üstidin birla waqitta tekshürüsh élip bérishni telep qilishning ilgiri misli körülüp baqmighan hadise ikenliki bildürülgen. Xewerde éytilishiche, teklip layihesi kéler hepte kishilik hoquq kéngishide awazgha qoyulidighan bolup, uningda Uyghurlar rayonidiki xorlash we depsendichiliklerni kishilik hoquq kéngeshining 2023-yilning bashliridiki yighinida munazire qilish telep qilin'ghaniken. Bir diplomat firansiye agéntliqigha qilghan sözide, bu teklipning nahayiti muhim ikenlikini, chünki “Uning xitayni kishilik hoquq kéngishining küntertipige olturghuzidighanliqi” ni éytqan.

Melum bolushiche, b d t kishilik hoquq kékishining 26-séntebir künidiki omumi yighinida, en'gliyening jenwede turushluq bash elchisi simon manléy: “Biz kishilik hoquqning bundaq éghir we sistémiliq depsende qilinishigha köz yummasliqimiz kérek” dep körsitip, “Bu kéngesh süküt qilsa bolmaydu hem süküt qilmasliqi shert” dégen.

Firansiye agéntliqining bildürüshiche, yighinda xitay wekiller ömikining ezasi, Uyghur aptonom rayonluq xelq qurultiyining mudiri shawket imin xitayni aqlap, bezi gherb döletlirining “Shinjangni muqimsizlashturush üchün kishilik hoquqni wasite qilmaqchi” boluwatqanliqini ilgiri sürgen. Uning sözini pakistan bilen afriqidiki malawining wekili qollighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.