Uyghur diyari bilen ningshya otturisidiki “Istratégiyelik hemkarliq” diqqet qozghimaqta

Xitay hökümiti bashqurushidiki “Xelq tori” ning 11-maydiki xewiride éytilishiche, Uyghur aptonom rayonluq partkomning sékrétari ma shingruy bashlamchiliqidiki ömek aldinqi küni ningshya xuyzu aptonom rayonigha bérip ékskursiye we tekshürüshte bolghan. Xewerde éytilishiche, bu qétimqi ömek terkibide ikki jaydiki aptonom rayonluq partkom we hökümetlerning asasliq kattabashliri toluq orun alghan.

Xewerde bu qétimliq tekshürüshning “Shi jinpingning yéngi dewrdiki xitayche alahidilikke ige sotsiyalizm idiyesi” ni estayidil öginish hemde “Shi jinpingning shinjang we ningshyani közdin kechürgen waqitta qilghan sözlirining rohini toluq izchillashturush” ikenliki alahide tekitlen'gen. Shuning bilen birge ningshyadiki énérgiye bayliqini hemde kömür kanlirini qézish sahesi bilen tejribe almashturush, nöwettiki “Bir belbagh bir yol qurulushi” ning ghelibilik ishqa éshishi üchün “Shinjang we ningshya rayonlirining istratégiyelik hemkarliqini toluq emelge ashurush”, shu arqiliq kömür yötkesh qurulushining we yerlik bayliqlarning qézilishini tézlitish qatarliq mesililernimu muzakire qilghan.

Ma shingruy bu heqte qilghan sözide éniq qilip “Biz bu xil hemkarliq asasida rayon halqighan medeniyet we sayahet supisi berpa qilishimiz, shu arqiliq islam dinini xitaychilashturush, jungxu'a ortaq kimliki chüshenchisini chongqurlashturush, shuningdek yéngi dewrdiki yuqiri süpetlik tereqqiyatni emelge ashurushimiz lazim” dégen. Ningshya xuyzu aptonom rayonining partkom sékrétari lyang yenshün bolsa bu nuqtilarni mu'eyyenleshtürüsh bilen birge “Bash shuji néme dégen bolsa biz shu boyiche ish körüshimiz lazim” dégen. Buning bilen bu qétimqi ékskursiyening asasliq meqsiti bu rayonlardiki bayliq qézish we yötkesh qurulushini téximu ünümlük dawam qildurush hemde shu arqiliq gherb dunyasining türlük iqtisadiy jaza tedbirliri tüpeylidin xitayning nöwette halsirap qéliwatqan “Bir belbagh bir yol qurulushi” gha “Küch qoshush” ikenliki wasitilik halda eskertilgen.

Xitay hökümitining Uyghur diyaridiki bayliq qézish istratégiyesi we siyasiy basturush tedbirliri toghrisida söz bolghanda amérika tewesidiki xitay öktichi ziyaliysi téng byaw radiyomizning ziyaritini qobul qilish jeryanida “Uyghurlar duch kelgen qismetler hazir xitayning bashqa jaylirigha kéngeytilish aldida turuwatidu. Bu bekmu xeterlik yüzlinishtur” dégenidi. Ma shingruy bashchiliqidiki ömekning bu qétimqi ziyariti arqiliq Uyghur diyarida “Sinaqtin ötken” siyasiy we iqtisadiy tedbirlerning ningshya teweside kéngeytilishi téximu roshen eks etken. Melum bolushiche, ma shingruy bashchiliqidiki bu ömek 2023-yilining béshida chingxey we gensu ölkiliridimu mushu xildiki ékiskursiyede bolghanidi.