Уйғур путбол чолпини ирфан һезимниң қоюп берилгәнлики илгири сүрүлди

Мухбиримиз әркин
2019.02.22
Share on WhatsApp
Share on WhatsApp

2018‏-Йили әтиязда тутқун қилинип дөрбилҗиндики бир йиғивелиш лагериға соланған атақлиқ путбол чолпини ирфан һезимниң қоюп берилгәнлики вә путбол кулубиға қайтип кәлгәнлики илгири сүрүлди.

Хоңкоңдики “җәнубий хитай сәһәр почтиси” гезитиниң 22‏-феврал хәвәр қилишичә, ирфан һезим өткән айда қоюп берилгән болуп, у лагердин қоюп берилгән аз сандики кишиләрниң бири икән. Ирфан һезимниң өткән йили тутқун қилинип, лагерға қамилиши хәлқарада хели зор ғулғула қозғиған. “хәлқара кәспий путболчилар бирләшмиси” баянат елан қилип, хитай һөкүмитиниң қилмишини тәнқид қилған.

Баянатта, униң дәрһал қоюп берилиши, аилиси билән җәм болуши вә кәспини әслигә кәлтүрүшигә йол қоюлуши тәләп қилинған иди.

Йәрлик даириләр униң испанийә вә әрәб бирләшмә хәлипиликигә чиққанлиқи сәвәблик тутқун қилинғанлиқини билдүргән. Чәтәллик язғучи вә паалийәтчи гене бунин “җәнубий хитай сәһәр почтиси” гзетигә қилған сөзидә, “ирфан һезимниң намдар шәхсләр ичидә һазирғичә қоюп берилгәнлики ашкариланған тунҗи киши” икәнликини билдүргән.

Америка һөкүмитиниң илгири сүрүшичә, нөвәттә 800 миңдин 2 милйонғичә уйғур, қазақ вә башқа мусулман милләтләр лагерларда тутуп турулмақта икән.

Ирфан һезим 2018‏-йили 2‏-айда ғайиб болғандин кейин у тунҗи қетим өткән айда хитай иҗтимаий таратқулирида пәйда болған. Әмма униң қоюп берилгәнлики дәлилләнмигән иди.

“җәнубий хитай сәһәр почтиси” гезитиниң хәвиридә баян қилинишичә, 18‏-феврал күни ирфан һезим топ ойнайдиған җяңсу суниң путбол кулуби хитай микро блогида мәзкур кулуб путболчилириниң гуаңдуңда мәшиқ қиливатқан рәсимини елан қилған. Рәсимләрниң иккисидә ирфанниң сүрити барлиқи илгири сүрүлгән.

Көзәткүчиләрниң пәрәз қилишичә, ирфан һезимниң қоюп берилгәнликигә даир хәвәрләрниң йеқинда башлинидиған б д т кишилик һоқуқ кеңишиниң йиллиқ йиғини һарписида елан қилиниши диққәт қозғайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.