Amérika awam palatasining tashqi ishlar komitéti Uyghurlargha a'it yene bir qanun layihesi maqullidi

Muxbirimiz erkin
2021-10-01
Share

Amérika awam palatasining tashqi ishlar komitéti 30 séntebir birdek awaz bilen Uyghurlargha a'it yene bir qanun layihesi maqullap, awaz palatasining awaz bérishige sun'ghan. Jumhuriyetchi awam palata ezasi yong kim teripidin sunulghan "2021-Uyghur siyasiti qanuni" namliq bu qanun layihesi démokratik awam palata ezasi ami béraning qollishigha érishken.

Qanun layiheside xelq'araning Uyghurlar uchrawatqan ziyankeshlikke qarita diqqitini qozghash üchün konkrét qedemler bilen etrapliq, köp tereplik istratégiye berpa qilish, tashqi ashlar ministirliqigha hoquq bérip, Uyghur ilidiki kishilik hoquq xirislirigha ünümlük taqabil turush, xitayning Uyghurlar awazini jimiqturushigha qarshi tedbir élish telep qilin'ghan.

Bu qanun layihesi Uyghurlar toghrisidiki yene bir qanun- "Uyghur mejburiy emgikining aldini élish qanun layihesi" awam palatasining maqullishini kütüp turghan, baydén hökümiti bu qanun'gha qarita téxi éniq pozitsiye bildürmigen bir waqitta sunuldi.

Awam palata ezasi yong kim 30-séntebir élan qilghan bayanatida: "Héchkim özining diniy étiqadi yaki milliti sewebidin özini bixeter hés qilmasliqi kérek. Epsuski, milyonlighan Uyghur we bashqa az sanliq milletler xitay xelq jumhuriyiti emeldarliri teripidin qayta-qayta jimiqturushqa, qolgha élinishqa, türmige tashlinishqa, qiyin-qistaqqa we ménge yuyushqa uchrap keldi" dégen.

Awam palata ezasi ami béra "Xitay kompartiyesi xelq'araning keng kölemlik tenqidige uchrap kéliwatqan bolsimu, biraq Uyghurlarning eqelliy heq-hoquqlirini depsende qilishni dawamlashturuwatqanliqi" ni eyibligen. Melum bolushiche, yéngi qanun layihesi amérika tashqi ishlar ministirliqida Uyghurlar ishigha mes'ul maslashturghuchi emeldar teyinlesh, amérika diplomatlirini Uyghur tilida terbiyelesh, Uyghurlargha a'it uchurlarni musulman döletlerge tarqitish qatarliq mezmunlarni öz ‍ichige alidiken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet