Amérika kéngesh palatasining "Uyghur kishilik hoquq qanun layihesi" ni mutleq köp awaz bilen maqullashqa heriket qiliwatqanliqi ilgiri sürüldi

Muxbirimiz erkin
2019-12-30
Share

Amérika kéngesh palatasining "Uyghur kishilik hoquq qanun layihesi" ni aq sarayaning ret qiliwétish éhtimalliqigha qarshi mutleq köp awaz bilen maqullashqa heriket qiliwatqanliqi ilgiri sürüldi. "Nyu-york waqti" gézitining xewer qilishiche, nöwette, kéngesh palatasidiki jumhuriyetchiler we démokratlarning "Uyghur kishilik hoquq qanun layihesi" ni mutleq köp awaz bilen maqullap, prézidéntning ret qiliwétish éhtimalliqining aldini élishqa heriket qilmaqta iken. Xewerde, bu qanun dölet mejlisidiki jumhuriyetchiler bilen démokratlar ortaq pikir hasil qilalighan yétük mesililerning biri ikenliki tekitlen'gen.

Amérika awam palatasi 3‏-dékabir küni "Uyghur kishilik hoquq qanun layihesi" ni mutleq köp awaz bilen maqullap, kéngesh palatasining maqullishigha sun'ghan. Lékin, kéngesh palatasining xizmet tertipi seweblik qanun layihesini awazgha qoyush kéler yilgha qalghanidi. "Nyu-york waqti" gézitining ilgiri sürüshiche, nöwette qanun chiqarghuchilar béyjingning Uyghur musulmanlirini basturush qilmishini jazalashta qanun layihesini yéterlik awaz bilen maqullap, prézidéntning imzalishini, eger imzalimisa dölet mejlisining mutleq köp awaz bilen qayta maqullishidek aqiwetke tewekkül qilishni oylashmaqta iken.

Xewerde körsitilishiche, dölet mejlisidiki jumhuriyetchiler nurghun mesililerde prézidént trampning teripini tutsimu, lékin nurghun jumhuriyetchiler kishilik hoquq mesiliside démokratlar bilen ortaq heriket qilmaqtiken. Xewerde, jumhuriyetchi kéngesh palata ezasi marku rubi'oning sözi neqil keltürülüp, uning "Hökümet tashqi siyasitide kishilik hoquqni muhim orun'gha qoymidi, dégen pikirler bar. Buning toghra bolushi natayin bolsimu, lékin bu xil pikir kücheymekte. Dölet mejlisi heriketke ötsun deydighan pikirler mewjut" dégenliki tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet