Uyghur aptonom rayoni da'iriliri amérikaning "Uyghur kishilik hoquq qanun layihesi" ge dawamliq hujum qilmaqta

Muxbirimiz erkin
2019-12-10
Élxet
Pikir
Share
Print

Uyghur aptonom rayoni da'irilirining 3‏-dékabir küni amérika awam palatasida maqullan'ghan "Uyghur kishilik hoquq qanun layihesi" ge qarshi hujumi keng kölemlik dawam qilmaqta.

Da'iriler ilgiri her derijilik hökümet emeldarlirini, diniy ölimalar we ziyaliylarni mezkur qanun layihesige qarshi ipade bildürüshke sélip kelgen. Buningda aqsuning walisi niyaz hashim, qeshqer walisi perhat rozi, qeshqer shehirining sheher bashliqi yasin yaqup, kelpin, tashqorghan, uchturpan nahiyelirining hakimi qatarliqlar maqale élan qilip, qanun layihesige qarshi ipade bildürgen. Lékin, xitay taratqulirining xewer qilishiche, nöwette da'iriler yene rayondiki zawut karxanilarda emgekke séliniwatqan sabiq lagér tutqunlirinimu qanun layihesige qarshi ishqa salmaqta iken.

Qeshqer kona sheher nahiyesining turghuni atigül qari ene shularning biridur. Atigülning éri alim raxman ilgiri lagérgha élip kétilip, yéqinda kona sheher nahiyesidiki bir karxanigha mejburiy emgekke yötkelgen. Atigül qari 10‏-dékabir "Tengritagh" torida maqale élan qilip, "Kespiy terbiyelesh merkezliri" namidiki lagérning éridiki "Esebiylik idiyesi" ni tazilap, uni "Normal adem" ge aylandurghanliqini ilgiri sürgen. Xoten nahiyeside olturushluq eziz tursun toxti xitay taratqulirida maqale élan qilip, lagérlarni aqlighan yene bir sabiq lagér tutquni. U 10‏-dékabir "Shinjang" gézitide élan qilghan maqaliside, "Terbiyelesh merkizige kirishining hayatidiki burulush nuqtisi" ikenlikini ilgiri sürgen. Lékin hazir xoten nahiyesidiki bir ayaq zawutida ishlewatqan eziz tursun toxti, özining burun néme ish qilidighanliqini chüshendürmigen. Ularning bu maqalilerni öz raziliqi yaki zakaz bilen yazghanliqi melum emes. Lékin, bu maqalilerning mezmunining hökümet teshwiqati bilen oxshash ikenliki diqqet qozghimaqta.

Toluq bet