“Shiwétsiye moda heptiliki” de Uyghur qirghinchiliqi tonushturuldi

3-Séntebir küni shiwétsiye paytexti stokholim shehride ötküzülgen “Shiwétsiye moda heptiliki” kiyim-kéchek féstiwalida modél qizlarning libasliri arqiliq Uyghur diyaridiki qirghinchiliq pa'aliyet ehlige janliq janliq rewishte körsitildi.

Yawropa parlaméntining ezasi, közge körün'gen siyasiy pa'aliyetchi rafa'él gluksman (Raphaël Glucksmann) ning féysbuk (yüz didar) tor bétide bérilgen uchurgha asaslan'ghanda, shu künidiki moda kiyimler féstiwalida xitay neslidin bolghan modél we pa'aliyetchi lu'isa shin (Louise Xin) ning yéqindin türtke bolushi netijiside “Shiwétsi'e moda heptiliki” ning mahirliri Uyghur qirghinchiliqi heqqidiki yéziqliq uchurni pa'aliyet ehlige namayen qilghan. Modél qizlarning kiyimige chong herpler bilen yézilghan “Uyghur mejburiy emgiki toxtisun!”, “Zamaniwi qullar emgikige xatime béreyli” dégendek sho'arlar nöwettiki zamaniwi qullar emgiki mesilisining kilimat mesilisidin qélishmaydighan muhim témilar ikenlikini tiwishsiz halda jakarlighan.

Melum bolushiche, rafa'él ependi, jewher ilham we lu'isa shin qatarliqlar bu mesilide yéqindin hemkarliship ish körgen hemde pa'aliyet uyushturghuchilarni Uyghurlar heqqidiki sho'arlarni namayen qilishqa maqul keltürgen. Shuning bilen birge Uyghur diyaridin chiqiwatqan paxta mehsulatlirining nöwette Uyghurlarning mejburiy emgiki arqiliq dunya kiyim-kéchek bazirini qaplawatqanliqini, buninggha qarshi turush heqqidiki pa'aliyetlerni shiwétsiyedin bashlap taki yawropa parlaméntigha qeder kéngeytish lazimliqini alahide tekitligen. Rafa'él ependi bu heqtiki ehwallarni tonushturup: “Sitokholimdiki pa'aliyet peqet kichikkine bir bashlinish. Biz moda kiyim heptilikining bu qétimqi insaniy herkitidin ümidning sholisini körgendek bolduq” dep yazghan.