9-Dékabir dunyaning herqaysiy jaylirida “Uyghur irqiy qirghinchiliq küni” xatirilinidiken

 9-Dékabir “Uyghur irqiy qirghinchiliq küni” bolup, bu munasiwet bilen 8-dékabir küni dunya Uyghur qurultiyi we Uyghur kishilik hoquq qurulushi birlikte amérika xelq'ara axbarat kulubida, 9-dékabir küni türkiye paytexti enqerede muxbirlarni kütiwélish yighini ötküzidiken؛  dunya Uyghur qurultiyi yene Uyghur akadimiyesi bilen  birlikte washn'gtonda 8-, 9-dékabir künliri ilmiy muhakime yighini ötküzidiken. Bu küni yene dunya Uyghur qurultiyi bilen hemkarlishiwatqan Uyghur teshkilatliri birleshme bayanat élan qilidiken we her qaysi döletlerde namayish ötküzidiken.

Bu yil 11-ayning 20-küni dunya Uyghur qurultiyi kéngeytilgen yighin chaqirip, 9-dékabir künini “Uyghur irqiy qirghinchiliq küni” qilip békitken we buni dunyaning her qaysi jaylirida ötküzüsh qarari alghanidi.

2021-Yil 12-ayning 9-küni londondiki “Uyghur sot kollégiyesi” xitayning Uyghurlargha élip barghan jinayitini “Irqiy qirghinchiliq”, “Insaniyetke qarshi jinayet” dep békitkenidi. Dunya Uyghur qurultiyining re'isi dolqun eysa radiyomizgha qilghan sözide, “Uyghur sot kollégiyesi” teripidin chiqirilghan bu hökümning tarixiy bir qarar ikenlikini, Uyghurlarning bu tarixiy paji'eni menggü untup qalmasliqi üchün, sotning hökmi chiqqan bu künni “Uyghur irqiy qirghinchiliqi küni” dep békitkenlikini, sotta guwahliq bergen 100 kishining guwahliqini tallap kitab qilip neshir qildurghanliqini, buning Uyghur irqiy qirghinchiliqini dunyagha bildürüshte zor ehmiyiti barliqini éytqanidi.