Amérikaliq bir a'ile Uyghurlarni qollash ‍üchün 780 kilométirliq “Tinch naraziliq sepiri” bashlighan

Ilgiri Uyghur élide yashighan amérikaliq bir a'ile Uyghurlarning erkinliki üchün 780 kilométirliq “Tinch naraziliq dala sepiri” bashlighan. “Zimistan” torining xewer qilishiche, “Yipek yoli tinchliq teshebbusi” namliq qurulushning qurghuchisi bolghan karol we natan dudilés a'ilisi kolorado shtatidiki édirliqlarni piyade aylinip, dala sayahetchilirige Uyghurlar uchrawatqan “Irqiy qirghinchiliq” ni tonushturidiken.

Xewerde, dudilés a'ilisining 780 kilométirliq “Tinch naraziliq sepiri” ni piyade bésip, yol boyi dala sayahetchilirige “Shinjangda yüz bériwatqan irqiy qirghinchiliqni tonushturidighanliqi we bu ishqa sayahetchilerning diqqitini qozghaydighanliqi” ni bildürgen.

Natan dudilés “Erkinlik sepiri” dep atighan bu herikitini ayali, oghli we bir dosti bilen oylap tapqan. U özlirining qedimki ispaniyediki “Kamino dé santiyago” dep atalghan diniy tawap yolidin ilham alghanliqi, pütkül yaz jeryanida kolorado édirliqliridiki yüzligen dala sayahetchilirige Uyghur krizisining xewirini tarqitidighanliqini bildürgen.

Dudilés yene lagér, dégen sözning uninggha nisbeten dala kawipi, tawuz we nurghun qiziqarliq nersilerdin dérek béridighanliqi, lékin bu sözning “Bügünki Uyghur balilirigha nisbeten pütünley eksiche menige ige” ikenlikini éytqan. Melum bolushiche, dudilés a'ilisi ‍ilgiri Uyghur éli we qazaqistanda 9 yil yashighan hem xizmet qilghaniken.