Уйғур районида юқум вәзийити еғирлишиватқан әһвалда хитай бу вирусни чәт әлдин киргән дәп тәшвиқ қилишқа башлиған

Мухбиримиз җәвлан
2022.08.10
Share on WhatsApp
Share on WhatsApp

Хитай таратқулириниң хәвәрлиригә қариғанда, уйғур аптоном районлуқ сәһийә-сақлиқни сақлаш комитетиниң муавин мудири сүй йән 8-авғуст күни өткүзүлгән “шинҗаңдики юқумни контрол қилиш ахбарат елан қилиш йиғини” да сөз қилип, уйғур районида тарқиливатқан йеңи типтики таҗсиман вирусниң хитайдики таҗсиман вирустин пәрқлинидиғанлиқини, униң чәт әлдин киргәнликиниң дәсләпки қәдәмдә муқимлашқанлиқини билдүргән.

Сүй йән мундақ дегән: “нөвәттә районимиздики бу юқум көп җайларға тарқилиш, мәлум җайға мәркәзлишип қелиштәк вәзийәттә туруватиду. юқумниң алдини елиш вә контрол қилиш иши мурәккәп, йәнә келип йеқиндин буян районимизға келидиған саяһәтчиләр көпийип қалди. Топлишип паалийәт қилиш вә район атлап саяһәт қилишлар юқумниң шинҗаңға кириш вә тез сүрәттә тарқилиш хәтирини күчәйтиватиду”. 

Ингилизчә хәвәр тарқитидиған хитай мәтбуатлиридиму сүй йәнниң бу гәплири кәң орун алған болуп, уйғур райониниң хитайдики әң даңлиқ саяһәт райони икәнлики, 7-айниң 30-күнидин 8-айниң 7-күнигичә 8 милйон 820 миң саяһәтчини күтүвалғанлиқи, буниңдин кейин саяһәтчиләрни юқумдин қоғдаш тәдбирлириниң күчәйтилидиғанлиқи хәвәр қилинған.  

7-Айниң 30-күни или областида тунҗи юқумдар байқалғандин башлап һазирғичә или области, чөчәк, қәшқәр, бортала, ақсу, қомул, үрүмчи қатарлиқ 7 вилайәт-област вә шәһәрләрдә, 12 наһийә, базар вә мәһәллиләрдә 274 юқумдар тәкшүрүп ениқланғанлиқи хитай мәтбуатлирида хәвәр қилинған иди. 8-Айниң 9-күни 24 саәт ичидә йәнә 122 юқумдар көпәйгән. Буниң ичидә ғулҗа шәһиридин 72, ғулҗа наһийәсидин 6, қомул шәһиридин 2, санҗи областиниң қутуби наһийәсидин 9, турпан шәһиридин 3, куча шәһиридин 2, үрүмчи тәңритағ районидин 7, сайбағ районидин 12 адәм юқумланған.

Хитай һөкүмити бир яқтин вирусни чәт әлдин киргән дәп пүтүн апәтниң мәнбәсини чәт әлгә артишқа орунса, бир яқтин саяһәтчиликни давамлаштурған. Уйғур аптоном районлуқ мәдәнийәт-саяһәт идарисиниң хитай мәтбуатлириға ашкарилишичә, һечқандақ айродром юқум сәвәбидин тақалмиған, саяһәтчиләр меһманханиларда беқилған, ятақ баһаси чүшүрүлгән. Пәқәт юқум еғир җайларда, мәсилән, үрүмчидә пойизниң қетим сани азлитилған. 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.