Uyghur rayonida yuqum weziyiti éghirlishiwatqan ehwalda xitay bu wirusni chet eldin kirgen dep teshwiq qilishqa bashlighan

Xitay taratqulirining xewerlirige qarighanda, Uyghur aptonom rayonluq sehiye-saqliqni saqlash komitétining mu'awin mudiri süy yen 8-awghust küni ötküzülgen “Shinjangdiki yuqumni kontrol qilish axbarat élan qilish yighini” da söz qilip, Uyghur rayonida tarqiliwatqan yéngi tiptiki tajsiman wirusning xitaydiki tajsiman wirustin perqlinidighanliqini, uning chet eldin kirgenlikining deslepki qedemde muqimlashqanliqini bildürgen.

Süy yen mundaq dégen: “Nöwette rayonimizdiki bu yuqum köp jaylargha tarqilish, melum jaygha merkezliship qélishtek weziyette turuwatidu. Yuqumning aldini élish we kontrol qilish ishi murekkep, yene kélip yéqindin buyan rayonimizgha kélidighan sayahetchiler köpiyip qaldi. Topliship pa'aliyet qilish we rayon atlap sayahet qilishlar yuqumning shinjanggha kirish we téz sür'ette tarqilish xetirini kücheytiwatidu”. 

In'gilizche xewer tarqitidighan xitay metbu'atliridimu süy yenning bu gepliri keng orun alghan bolup, Uyghur rayonining xitaydiki eng dangliq sayahet rayoni ikenliki, 7-ayning 30-künidin 8-ayning 7-künigiche 8 milyon 820 ming sayahetchini kütüwalghanliqi, buningdin kéyin sayahetchilerni yuqumdin qoghdash tedbirlirining kücheytilidighanliqi xewer qilin'ghan.  

7-Ayning 30-küni ili oblastida tunji yuqumdar bayqalghandin bashlap hazirghiche ili oblasti, chöchek, qeshqer, bortala, aqsu, qomul, ürümchi qatarliq 7 wilayet-oblast we sheherlerde, 12 nahiye, bazar we mehellilerde 274 yuqumdar tekshürüp éniqlan'ghanliqi xitay metbu'atlirida xewer qilin'ghan idi. 8-Ayning 9-küni 24 sa'et ichide yene 122 yuqumdar köpeygen. Buning ichide ghulja shehiridin 72, ghulja nahiyesidin 6, qomul shehiridin 2, sanji oblastining qutubi nahiyesidin 9, turpan shehiridin 3, kucha shehiridin 2, ürümchi tengritagh rayonidin 7, saybagh rayonidin 12 adem yuqumlan'ghan.

Xitay hökümiti bir yaqtin wirusni chet eldin kirgen dep pütün apetning menbesini chet elge artishqa orunsa, bir yaqtin sayahetchilikni dawamlashturghan. Uyghur aptonom rayonluq medeniyet-sayahet idarisining xitay metbu'atlirigha ashkarilishiche, héchqandaq ayrodrom yuqum sewebidin taqalmighan, sayahetchiler méhmanxanilarda béqilghan, yataq bahasi chüshürülgen. Peqet yuqum éghir jaylarda, mesilen, ürümchide poyizning qétim sani azlitilghan.