Уйғур қизи мунәввәр абдулланиң инглизчә шеири австралийәдә мукапатқа еришти

Мухбиримиз қутлан
2017-08-30
Елхәт
Пикир
Share
Принт

Мунәввәр абдулла муһаҗирәттики уйғурлар арисидин йетишип чиққан яш шаирә вә актип язарларниң бири.

Униң инглиз тилида язған «вәтинини издигән бала» намлиқ шеири 2017-йили австралийәдики җәнубий велс университетиниң журнилида елан қилинған болуп, бу шеир йеқинда австралийәдә шеирийәт мукапатиға еришкән.

«Вәтинини издигән бала» намлиқ бу шеир юқири бәдиий маһарәт вә әркин услубта йезилған болуп, униңда муһаҗирәттә туғулған иккинчи әвлад уйғур балилиридики өз кимликини издәш туйғуси, ата-бовилири яшиған, әмма өзлири яшиялмиған йирақтики вәтинигә болған ғайибанә тәлпүнүши шундақла әсли вәтини билән муһаҗирәттики иккинчи вәтини оттурисидики мурәккәп һессиятлири күчлүк шеирий бошлуқта ипадә қилинған.

Мәзкур шеирниң мисралирида учрайдиған «тәңритағ», «тәклимакан», «или», «караван», «әткән чай» қатарлиқ уйғурчә сөзләр инглиз тилида ипадә қилиниватқан шеирий ейтимни қоюқ миллийликкә вә өзгичиликкә игә қилған.

Яш шаирә мунәввәр абдулла 1994-йили австралийәдә уйғур аилисидә туғулған. Америкада толуқ оттура мәктәпни тамамлиғандин кейин һазир австралийәдики җәнубий велс университетида медитсина пәнлири бойичә магистирлиқта оқумақтикән.

Мунәввәр абдулла 15 йешидин башлап инглиз тилида шеир йезишқа башлиған. Униң шеирлири америкидики оттура мәктәп журналлири билән башқа шеирийәт журналлирида елан қилинған.

Мунәввәр абдулланиң «мән уйғур, мән қаршилиқ көрситимән» намлиқ мақалиси америкидики даңлиқ журнал - «дипломат» ниң бу йиллиқ июн санида елан қилинип, күчлүк инкас пәйда қилған иди.

Толуқ бәт