Хотән сақчилири уйғурлар ясиған тик учарниң учушиға йол қоймиди

Мухбиримиз меһрибан
2013.04.19

Тор бекәтлиридики учурлардин мәлум болушичә, 18-апрел күни әтигәндә хотән “узун сәпәр ремонтханиси” дики уйғурлар ясиған тик учар айропилан хотәндики иқтисад тәрәққият районида тунҗи қетим учуш синиқи елип берип мувәппәқийәт қазанған.

Уйғур биз ториниң хәвиридә дейилишичә, шу күни мәйданға топланған уйғурларниң зиядә көплүки даириләрни әнсирәткини үчүн, хотән сақчилири тик учарниң һавада давамлиқ учуш мәшиқи елип беришни чәклигән. Нәтиҗидә ремонтханидикиләр тик учарни чоң типтики йүк аптомобилиға бесип учуш мәйданидин айрилған.

Йеқиндин буян тор бекәтлиридә, уйғурлар тәрипидин ясалған аптомобил, айропилан қатарлиқлар һәққидики хәвәрләр барғанчә көпәймәктә. Мәлум болушичә, хотәндә ясалған тик учар айропиландин илгири турпандики уйғурлар тәрипидин ясалған турпан1, турпан 2 қатарлиқ айропиланлар һәққидә хәвәр берилгән болуп, турпан 1 учуш синиқида мәғлуп болған болсиму, әмма турпан2ниң мувәппәқийәт қазанғанлиқи илгири сүрүлмәктә.

Хитайниң хәлқ ториниң 19-апрелдики хәвиридә ақсу онсу наһийә тоғрақ йезисидики 30 яшлиқ деһқан ширәли әмәтниңму кичик типтики бир айропилан ясап, айропиланниң 80% қисмини ясап пүттүргәнлики хәвәр қилинди. Хәлқ ториниң хәвиридә йәнә, ширәлиниң 70 миң сом сәрп қилип ясаватқан бу айропиланини деһқанчилиқ дорилирини чечиш яки орманлиқта йүз беридиған от апити қатарлиқларда ишлитишни пиланлаватқанлиқи хәвәр қилинди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.