Xoten saqchiliri Uyghurlar yasighan tik ucharning uchushigha yol qoymidi

Tor béketliridiki uchurlardin melum bolushiche, 18-aprél küni etigende xoten “Uzun seper rémontxanisi” diki Uyghurlar yasighan tik uchar ayropilan xotendiki iqtisad tereqqiyat rayonida tunji qétim uchush siniqi élip bérip muweppeqiyet qazan'ghan.

Uyghur biz torining xewiride déyilishiche, shu küni meydan'gha toplan'ghan Uyghurlarning ziyade köplüki da'irilerni ensiretkini üchün, xoten saqchiliri tik ucharning hawada dawamliq uchush meshiqi élip bérishni chekligen. Netijide rémontxanidikiler tik ucharni chong tiptiki yük aptomobiligha bésip uchush meydanidin ayrilghan.

Yéqindin buyan tor béketliride, Uyghurlar teripidin yasalghan aptomobil, ayropilan qatarliqlar heqqidiki xewerler barghanche köpeymekte. Melum bolushiche, xotende yasalghan tik uchar ayropilandin ilgiri turpandiki Uyghurlar teripidin yasalghan turpan1, turpan 2 qatarliq ayropilanlar heqqide xewer bérilgen bolup, turpan 1 uchush siniqida meghlup bolghan bolsimu, emma turpan2ning muweppeqiyet qazan'ghanliqi ilgiri sürülmekte.

Xitayning xelq torining 19-apréldiki xewiride aqsu onsu nahiye toghraq yézisidiki 30 yashliq déhqan shir'eli emetningmu kichik tiptiki bir ayropilan yasap, ayropilanning 80% qismini yasap püttürgenliki xewer qilindi. Xelq torining xewiride yene, shir'elining 70 ming som serp qilip yasawatqan bu ayropilanini déhqanchiliq dorilirini chéchish yaki ormanliqta yüz béridighan ot apiti qatarliqlarda ishlitishni pilanlawatqanliqi xewer qilindi.