Uyghur élidin xitaygha yötkelgen tok miqdari 300 milyard kilowattin éship ketti

Xitay hökümiti bashqurushidiki “Xitay xewerliri” torining 8-öktebirdiki xewiride éytilishiche, “Sanji-guchu'en yuqiri bésimliq tok yollash qurulushi” arqiliq shu kün'ge qeder Uyghur élidin xitay ölkilirige yötkelgen omumiy tok miqdari 302 milyard kilowattin ashqan. Xitayning nöwettiki otturiche tok bahasi boyiche hésablighanda bu texminen 36 milyard amérika dollirigha toghra kélidiken.

Mezkur tok yollash qurulushi sanji shehiridin enxuy ölkisidiki guchu'en békitigiche sozulghan bolup, omumiy uzunluqi üch ming kilométirdin ashidiken. Xewerde bu hal “Shinjangning bayliq ewzellikini iqtisadiy ewzellikke aylandurush yolidiki bir muhim qedem, shundaqla dölitimizning tok bilen teminlesh sistémisini kapaletke ige qilghuchi muhim qurulush” déyilgen.

Melum bolushiche, mezkur qurulush Uyghur élidin xitay ölkilirige tok yollashtiki ghol liniye bolup, buning normal we bixeter méngishi üchün xitay hökümiti köpligen tedbirlerni qollan'ghan. 2024-Yili mezkur liniye arqiliq xitay ölkilirige toshulghan tok miqdari aldinqi yildikidin toqquz pirsent ashqan. 2024-Yili iyul éyidiki melumatlarda körsitilishiche, bu qurulushta künige 254 milyon kilowat tok yollinidighan bolup, bu tok töt nopusluq 130 ming a'ilining bir yilliq tok serpiyatini qamdiyalaydiken.

Halbuki, xitay ot éléktir istansilirining jungghar oymanliqini baza qilghan halda kömürni köydürüp tok chiqirishi we bu tokni sherqqe yötkishining Uyghur élining muhitini qaysi derijide weyran qiliwetkenliki yéqinqi yillarda köp diqqet qozghighan mesililerdin bolup qalghan. Yene kélip, xitayning eng chong énérgiye bazisi bolghan Uyghur élidiki Uyghurlarning namrat turmushi hemde buninggha qoshulup dawam qiliwatqan irqiy qirghinchiliq izchil türde bu xil énérgiye yötkesh qurulushigha roshen sélishturma bolup kelmekte.